Սով, ցուրտ, լքվածություն, թալան, քաոս. ի՞նչ է կատարվում Թուրքիայում երկրաշարժի 3-րդ օրը

Հակառակ պաշտոնական Անկարայի ամպագոռգոռ հայտարարություններին, թե Թուրքիան ինքնուրույն կարող է անհրաժեշտ օգնություն տրամադրել իր քաղաքացիներին և վերացնել ավերիչ երկրաշարժի հետևանքները, աղետի գոտուց ստացված ոչ պաշտոնական տեղեկությունները վկայում են այն մասին, որ Թուրքիայի իշխանություններն ի զորու չեն միայնակ գլուխ հանել ստեղծված իրավիճակում։ Ընդհակառակը, թուրքական կողմի՝ միջազգային հանրության, այդ թվում Հայաստանի օգնությունը չընդունելու համառությունն է’լ ավելի է բարդացրել իրավիճակը։

Քրդական «Ֆըրաթ» գործակալությունն սահմռկեցուցիչ տվյալներ է ներկայացնում աղետի գոտուց։ Ըստ լրատվամիջոցի՝ Վանում, որի փողոցներում է հայտնվել երկրաշարժի պատճառով առանց տանիքի մնացած մոտ 500 հազար մարդ, օգնությունը հասել է 24 ժամ ուշացումով։ Իշխանությունները կարողացել են վրանով և սննդով ապահովել 0,5 միլիոն քաղաքացիների միայն չնչին մասին։

«Մենք օգնության կարիք ունենք։ Չի բավականացնում ոչ սնունդը, ոչ դեղորայքը, ոչ էլ վրանները։ Կարմիր մահիկն ասում է, որ բնակչությանը բաժանվել է 8 հազար վրան։ Սակայն 100 հազարն էլ չի բավականացնի։ Բնակչության մեծ մասը դրսում է։ Վանի 60%-ն ավերված է։ Հողին է հավասարվել 30-40 գյուղ։ Շատ երկրներ կան, որ ցանկանում են օգնել Թուրքիային։ Սակայն մեզ առայժմ օգնություն չի հասել։ Վանում երկրաշարժի հետևանքով փողոցում է հայտնվել առնվազն 500 հազար մարդ»,– ասել է Վանի քաղաքապետարանի ներկայացուցիչ Սաբրի Աբին։

Քրդական լրատվամիջոցը նշում է, որ չնայած երկրաշարժից անցել է 2 օր, առայժմ որևէ օգնություն չի տրամադրվել երկրաշարժից տուժած 50 գյուղերի։ Առաջիկայում այդ վայրերում սպասվում է ցուրտ եղանակ և ձյուն, որն ավելի է դժվարացնելու փրկարաների աշխատանքները։

Այդ ընթացքում Վանում ակցիաներ են կազմակերպվում երկրաշարժից տուժած քաղաքացիները՝ ընդդեմ իշխանությունների կողմից իրենց նկատմամբ ցուցաբերվող անտարբերության։

Ցուցարարները, որոնք պահանջում են իրենց հատկացնել անհրաժեշտ օգնություն, փողոց են դուրս եկել` Վանի նահանգապետի հրաժարականի պահանջով։ Ցուցարարներին ցրելու համար իշխանությունները մեծ թվով իրավապահներ և զինվորներ են ուղարկել աղետի գոտի։ Ակցայի ժամանակ բախում է տեղի ունեցել ցուցարարների և ոստիկանների միջև։ Իրավապահները երկրաշարժից տուժածների դեմ օգտագործել են արցունքաբեր գազ։ Ներկա պահին Վանի փողոցներում դեռևս շարունակվում են բողոքի ակցիները։

Ստեղծված իրավիճակում անելանելի դրության մեջ հայտնված քաղաքացիները հարձակվում են օգնություն բաժանող բեռնատարների վրա և թալանում դրանք։

Ինչպես գրում է թուրքական «Ռադիքալ» օրաթերթը, Վանի փողոցներում սկսել են քննադատել իշխանություններին նաև այն բանի համար, որ վերջինս հրաժարվել է իրեն ամենամոտ գտնվող հարևանի՝ Հայաստանի օգնությունից։

Մեկնաբանելով ստեղծված իրավիճակը՝ «Խաղաղություն և ժողովրդավարություն» քրդամետ կուսակցության համանախագահ Սելահաթթին Դեմիրթաշը քննդատել է իշխանություններին՝ քաղաքացիներին անհրաժեշտ օգնություն տրամադրել չկարողանալու համար։

«Արդյունքում փլատակների տակ դարձյալ պետությունը մնաց»,– ասել է Դեմիրթաշը։

25.10.11

Tert.am