Վանի երկրաշարժից հետո Նեմրութ լեռան հրաբուխը կարող է ժայթքել

Թուրքիայի Վան նահանգում հոկտեմբերի 23-ին տեղի ունեցած ուժգին երկրաշարժից հետո կարող է Վանա լճի հարեւանությամբ գտնվող Նեմրութ լեռան հրաբուխը ժայթքել։ Այդ մասին Թուրքիային զգուշացրել է Հունգարիայի արտակարգ իրավիճակների վարչությունը՝ RSOE EDIS-ը։

Նշվում է, որ Վան, Մուշ եւ Բիթլիս նահանգների միջեւ գտնվող Նեմրութ լեռան հրաբխային գործունեության վերաբերյալ Թուրքիայում հետազոտություններ չկան։

Նեմրութ լեռն ունի 3050 մետր բարձրություն, որի խառնարանում վերջին հրաբխային ժայթքումից հետո 2 գեղեցիկ լճեր են առաջացել։

Հրաբխի ժայթքման դեպքում շրջակա բնակավայրերին մեծ վնաս կհասցվի, քանի որ ժայռի ճեղքման դեպքում լճի ջուրը կարող է մեծ ավերածությունների պատճառ դառնալ։

Նշենք, որ Թուրքիայի Վանի նահանգում հոկտեմբերի 23-ին տեղի ունեցած ուժգին երկրաշարժի հետեւանքով Վանում եւ Արճեշում մահացածների թիվը հասել է 366-ի, իսկ վիրավորվածներինը՝1301-ի։ Փլված շենքերի թիվն անցնում է 2 հազարը։ 7,2 մագնիտուդով երկրաշարժը տեղի է ունեցել Վանի նահանգում հոկտեմբերի 23-ին, տեղի ժամանակով 13։41-ին: Էպիկենտրոնը եղել է Վանից 38 կմ հյուսիս-արեւելք՝ Թաբանլը գյուղի մոտակայքում։

Ուժգին երկրաշարժից հետո դեռեւս շարունակվում են ցնցումները։ Վերջին 48 ժամվա ընթացքում Վանի նահանգում գրանցվել է 400-ից ավել ցնցում։

Հոկտեմբեր 26, 2011

Լուրեր Հայաստանից – NEWS.am