Այսօր կվերաբացվի Դիարբեքիրի Սուրբ Կիրակոս եկեղեցին

Այսօր 30 տարվա ընդմիջումից հետո հայ հավատացյալների առջև իր դռները կբացի Թուրքիայի Դիարբեքիր քաղաքում գտնվող Մերձավոր Արևելքի ամենամեծ հայկական եկեղեցին՝ Սուրբ Կիրակոսը։

Թուրքական «Ռադիքալ» օրաթերթի հետ զրույցում Պոլսո հայոց պատրիարքական փոխանորդ Արամ արքեպիսկոպոս Աթեշյանն ասել է, որ այսօր եկեղեցու բացման արարողությանը և վաղը՝ հոկտեմբերի 23-ին, մատուցվելիք պատարագին աշխարհի տարբեր երկրներից մասնակցելու են հազարավոր հայեր։

Ավելի վաղ ԱՄՆ Արևելյան թեմի թեմական խորհրդի ատենապետը Օսկար Թաթոսյանը թուրքական «Զաման» օրաթերթին ասել էր, որ ԱՄՆ Արևելյան թեմի առաջնորդ Խաժակ արքեպիսկոպոս Պարսամյանի գլխավորությամբ 25 հոգանոց պատվիրակությունը պատրաստվում է այցելել Թուրքիա և մասնակցել Սուրբ Կիրակոս եկեղեցու բացման արարողությանը։

Սուրբ Կիրակոսը Մերձավոր Արևելքում ամենամեծ հայկական եկեղեցին է, որը վերջին 30 տարիների ընթացքում չի գործել։ Առաջին աշխարհամարտի տարիներին գերմանացիները եկեղեցին օգտագործել են որպես շտաբ, ավելի ուշ այն վերածվել է պահեստի։
Սուրբ Կիրակոս եկեղեցու վերանորոգման աշխատանքների համար ծախսվել է 3,4 միլիոն դոլար։ Ծախսերի 70%-ը հոգացել է Պոլսո հայ համայնքը, իսկ 30%-ը` Դիարբեքիրի քաղաքապետարանը:

22.10.2011

Tert.am