Թուրքիան անդունդն է գլորվում. քուրդ կուսակցապետ

Թուրքիայի խորհրդարանի միակ քրդական «Խաղաղություն եւ ժողովրդավարություն» կուսակցության նախագահ Սելահաթին Դեմիրթաշը, խոսելով PKK-ի կողմից սպանված 24 թուրք զինվորականների մասին, նշել է, թե Թուրքիան ոչ թե անդնդի եզրին է, այլ՝ անդունդն է գլորվում։

Թուրքական Milliyet-ի փոխանցմամբ՝ քուրդ կուսակցապետն ասել է, թե մեկ օր առաջ PKK-ի (Քուրդիստանի բանվորական կուսակցություն) կողմից թուրք զինվորականների դեմ իրականացրած  հարձակման մասին լուրը տխրեցնող է եւ ցավալի։ Նա նշել է, թե մի քանի ամսում իրադարձությունները հասան պատերազմի մակարդակի։

«Մենք բազմաթիվ անգամ զգուշացրել ենք «PKKն կվերացնենք», «PKK-ի մեջքը կոտրել ենք», Օդային հարձակում կսկսենք» արտահայտությունները անողներին, որ այդ հարցը նման ձեւով չի լուծվի։ Մենք միշտ առաջարկել ենք երկխոսության եւ հաշտեցման ճանապարհը։ Սակայն մեր ոչ մի առաջարկ իշխանությունները չընդունեցին։

PKK-ն ունի հազարավոր զինված անդամներ եւ աջակցություն  միլիոնավոր մարդկանց կողմից։  Թուրքիան ներկայումս ոչ թե անդունդի եզրին է, այլ՝ անդունդն է գլորվում։ Եւ պետք է միջոցներ ձեռնարկել, որպեսզի վայրէջքը թեթեւ լինի, վնասները՝ քիչ»,-ասել է քրդական կուսակցության առաջնորդը։

Նշենք, որ հոկտեմբերի 19-ին Իրաքի հետ Թուրքիայի սահմանին գտնվող մի շարք զորամասեր PKK-ի կողմից ենթարկվել են համաժամանակյա հարձակման, որի հետեւանքով սպանվել է 24 թուրք զինվորական եւ վիրավորվել՝ 22-ը։

Այս հարձակումից հետո թուրքական զինված ուժերը օդային եւ ցամաքային գործողություններ են սկսել Հյուսիսային Իրաքի տարածքում գտնվող PKK-ի ճամբարների դեմ։

21.10.2011

Լուրեր Հայաստանից – NEWS.am