Դիարբեքիրի Սուրբ Կիրակոս եկեղեցում պատարագ կմատուցվի

Արմեն Հովհաննիսյան

Դիրաբեքիրում գտնվող Սուրբ Կիրակոս եկեղեցում այս կիրակի օրը՝ հոկտեմբերի 23-ին, երկու տարի տևած վերականգնողական աշխատանքների ավարտից հետո պատարագ է մատուցվելու:

Սուրբ Կիրակոս եկեղեցին օծվելու է հոկտեմբերի 22-ին, Սուրբ Պատարագը մատուցվելու է օծությանը հաջորդող օրը:

«Հյուրիեթ» պարբերականի փոխանցմամբ, եկեղեցու վերականգնմանը մեծ աջակցություն են ցուցաբերել պոլսահայերը՝ ծնունդով դիարբեքիրցի գործարար Վարդգես Էրգյուն Այիքի և Ստամբուլի նախկին բնակիչ, այժմ Կանադայում բնակվող Ռաֆֆի Պետրոյսյանի նախաձեռնությամբ:

Եկեղեցու վերականգնման նախագծին որոշ օժանդակություն ցուցաբերել է նաև Դիարբեքիր քաղաքի Սուր շրջանի ղեկավարությունը, իսկ Ստամբուլի Բաքըրքյոյ շրջանի ղեկավարի գրասենյակը տրամադրել է երկու անվճար ավտոբուս՝ արարողությանը մասնակցելու ցանկություն հայտնած անձանց Դիարբեքիր տեղափոխելու համար:

Սպասվում է, որ Սուրբ Կիրակոս եկեղեցում կիրակի օրը մատուցվող պատարագին մասնակցելու է մոտ 1 500 մարդ, որոնք քաղաք են ժամանելու Ստամբուլից, Հայաստանից և Միացյալ Նահանգներից, ինչպես նաև եվրոպական և մերձավորարևելյան պետություններից:

Հոկտեմբեր 21, 2011

http://www.voanews.com/armenian/news/world/turkey-armenian-church-132291193.html