Թուրքիայի լրագրողների ընկերակցությունը (TGC) որոշել է 1915թ. Հայոց ցեղասպանությանը զոհ գնացած հայ երկու լրագրողների անուններն ընդգրկել «Թուրքիայի տարածքում սպանված լրագրողների ցանկում»: Ընկերակցությունը հետեւել է Ժամանակակից լրագրողների ընկերակցության (ÇGD) օրինակին, եւ Մամուլի թանգարանում հատուկ տարածք է հատկացվելու հայ լրագրողների հիշատակի համար:
«Մեզ համար կարեւորն այն է, որ նրանք մեր գործընկերներն են, նրանց կրոնը, լեզուն եւ գործունեությունը էական չէ»,- Hürriyet Daily News-ին հայտնել է TGC-ի փոխնախագահ Ահմեթ Օզդեմիրը:
Սակայն ի տարբերություն Ժամանակակից լրագրողների ընկերակցության, որը սպանված լրագրողների իր ցանկում վերջին ամիսներին ներառել էր 10 հայ լրագրողների անուններ, TGC-ն ծրագրում է ընդգրկել միայն երկու՝ «Սաբահ» եւ «Ջիհան» պարբերականների խմբագիր Տիրան Քելեքյանի եւ գրող, լրագրող եւ Օսմանյան խորհրդարանի պատգամավոր Գրիգոր Զոհրաբի անունները:
Զոհրաբն ու Քելեքյանը այն հարյուրավոր հայ մտավորականների շարքում էին, որոնց 1915թ. ապրիլի 24-ին Ստամբուլից տեղափոխեցին եւ սպանեցին:
19.10.2011
Leave a Reply