1915-1923 թվականների ընթացքում հայ, հույն եւ ասորի ժողովուրդները դարձել են ժամանակակից պատմության առաջին ցեղասպանության զոհերը: Ինչպես «Արմենպրես»-ին տեղեկացրին Ավստրալիայի Հայ դատի հանձնախմբից, Ավստրալիայի սենատում ունեցած իր ելույթի ժամանակ այս մասին նշել է ավստրալացի սենատոր Նիք Քսենոֆոնը` պնդելով, որ երկրի խորհրդարանի վերին պալատը պետք է ճանաչի մարդկության դեմ կատարված այս հանցագործությունը որպես ցեղասպանություն: «Նույնիսկ զոհերի հստակ թվերը հայտնի չեն, սակայն մոտավոր հաշվարկներով Օսմանյան կայսրության համակարգված եւ նպատակադրված գործողությունների զոհ են գնացել շուրջ 3.5 մլն մարդ»,- ասել է նա:
Սենատորն ավելացրել է, որ շարունակելու է աշխատել Ավստրալիայի հայ եւ հույն համայնքների հետ` մշակելու համար այդ դեպքերի ճանաչման վերաբերյալ օրենսդրական նախագիծ:
«Նախկինում Ավստրալիան խուսափել է այս դեպքերը ցեղասպանություն որակելուց` Թուրքիայի հետ ունեցած դիվանագիտական հարաբերությունների պատճառով»,- ասել է Ն.Քսենոֆոնը` հավելելով, սակայն, որ այս հարցում պետք է հետեւել բարոյական դիրքորոշմանը: «Ժամանակը եկել է, որ Ավստրալիան ընտրի իր դիրքորոշումը»,- շեշտել է նա:
Սենատորի հայտարարությունները ողջունել են Ավստրալիայի Հայ դատի հանձնախմբի գործադիր տնօրեն Վարանտ Մեգերդեչյանը’ շեշտելով, որ աննախադեպ թվով ավստրալացի սենատորներ են միացել Ն.Քսենոֆոնի կոչին: Հայտարարությունը ողջունել է նաեւ Ավստրալիայի հունական համայնքի ղեկավար Ջորջ Վելիսը:
17.10.2011
ԱՐՄԵՆՊՐԵՍ
Leave a Reply