Թուրքիայի Չուքուրովա (Կիլիկիա) շրջանի Քոզան գավառում գտնված կառույցը, որը նախկինում եղել է հայկական հացատուն, հիվանդանոց և եկեղեցի, 1920 թ. մինչև 1923 թ. թուրքերի կողմից օգտագործվել է որպես օրիորդաց դպրոց: Այդ մասին Ադանայից հաղորդում է թուրքական «Անադոլու» պետական լրատվական գործակալությունը: Կառույցը հետագայում էլ վերածվել է տարրական դպրոցի և ստացել «Հեղափոխական տարրական դպրոց» անվանումը: Ինչպես նշում է վերոնշյալ թուրքական աղբյուրը, դպրոցի տնօրինությունը միջոցներ է ձեռնարկել` դպրոցի պատմությունը պահպանելու ուղղությամբ: Այսպես` 1920-23 թթ. հայկական եկեղեցու մեջ որպես օրիորդաց դպրոց բացված և Թուրքիայի Հանրապետության հռչակումից հետո «Հեղափոխական տարրական դպրոց» վերանվանված կրթօջախի որոշ հին իրեր խնամքով պահպանվել և ցուցադրվում են դպրոցի մուտքի մի անկյունում: Դպրոցի տնօրեն Հյուզեյֆե Ֆընդըքը «Անադոլու» գործակալության թղթակցի հետ զրույցում շեշտում է, թե «նման միջոցառումների շնորհիվ աշակերտների շրջանում կզարգանա պատմական գիտակցությունը»: Փաստորեն, թուրք ուսուցիչների և աշակերտների համար պատմությունն սկսվում է 1920-23 թվականներից:
17.10.2011
Leave a Reply