Դիարբեքիրի Սուր քաղաքի քաղաքապետ Աբդուլլահ Դեմիրբաշը այսօր` հոկտեմբերի 14-ին, այցելում է Ստամբուլ` Դիարբեքիրի Սուր քաղաքի Մշակույթների փողոցի հարցը հայկական, հունական և ասորական համայնքների ներկայացուցիչների հետ քննարկելու նպատակով:
2005 թ. մեկնարկած սույն նախագծի առնչությամբ «Թարաֆ» օրաթերթին հարցազրույց տված Դեմիրբաշը հայտնեց, որ Դիարբեքիրի բազմալեզվական, բազմամշակութային էությունն արտացոլող Մշակույթների փողոցում գոյություն ունեն մզկիթ, ջեմևի (ալևիների աղոթատուն), ասորական կաթոլիկ եկեղեցի, հայկական եկեղեցի, քաղդեական եկեղեցի, սինագոգ և եզդիների տուն: Աբդուլլահ Դեմիրբաշը նաև հաղորդեց, որ Սուրբ Կիրակոս հայկական եկեղեցին, որի վերականգնողական աշխատանքներն ավարտին են հասցվել, և որը սույն թվականի հոկտեմբերի 22-ին բացվելու է կրոնական արարողությունների առաջ, նույնպես գտնվում է Մշակույթների փողոցում: Դեմիրբաշը Ստամբուլում, ուր ժամանելու է տարբեր կրոնների և մշակույթների ներկայացուցիչներից բաղկացած մի պատվիրակությամբ, հանդիպումներ է ունենալու Հրանտ Դինքի անվան հիմնադրամի անդամների, Պոլսո հայոց պատրիարքի տեղապահ Արամ Աթեշյանի և Հունաց պատրիարք Բարդուղիմեոսի հետ:
Օզլեմ Էրթան
13.10.2011
«Թարաֆ»
Leave a Reply