Բաթմանի Սասունի հայերի միությունը որոնում է պատմական Սուրբ Աստվածածին հայկական եկեղեցու` տարիներ առաջ կորած 300 կիլոգրամանոց երկաթե դուռը:
Այս տարվա հուլիս ամսին դուռը գտնելու խնդրանքով Մշակույթի նախարարությանը դիմած միության ղեկավարությանը պատասխանել է Դիարբեքիրի մշակութային և բնական հարստությունների պահպանման շրջանային խորհրդի տնօրինությունը: Վերջինիս ուղարկած գրության մեջ, որում նշվում էր, թե տվյալ եկեղեցին 2008 թ. առնվել է Մշակութային և բնական հարստությունների պահպանման գերագույն խորհրդի հովանու տակ, ասվում էր նաև, որ այդ տարեթվին արված լուսանկարներում ևս եկեղեցու դուռը չի եղել: Բանավոր կերպով նույն պատասխանն է տվել նաև Բաթմանի նահանգի Մշակույթի տնօրինությունը:
Ինչ վերաբերում է Բաթմանի Սասունի հայերի միության նախագահ Ազիզ Դաղջըին, ապա վերոնշյալ պատասխանը չի գոհացրել վերջինիս, քանի որ նա պնդում է, թե դուռը 2000-ականների սկզբներին տեղում է եղել. «Հայերի համար կրոնական և հոգևոր առումներով մեծ նշանակություն կրող Մարութա լեռան վրա կառուցված Սուրբ Աստվածածին հայկական եկեղեցին միևնույն ժամանակ պետության պատմական ու մշակութային ժառանգությունն է: Այն փաստը, որ եկեղեցու դուռը գողացվել է նախքան պահպանման տակ վերցվելը, չի կարող «Ինձ ինչ» տրամաբանության հիմնավորումը լինել»: Դաղջըն հայտնելով, որ մի երկրորդ գրությամբ ևս հանդես գալով` թարմացնելու են իրենց պահանջը, ասաց նաև, թե միևնույն պատասխանը ստանալու դեպքում նախ կփորձեն հարցը լուծել ներքին իրավական ճանապարհով, իսկ հետո` կդիմեն Մարդու իրավունքների եվրոպական դատարան: Իսկ ուսումնասիրող Բեսսե Քաբաքը հայտնեց, որ դուռը գողացվել է ոչ թե 2000-ական թվականներին, այլ 1981 թ. հունիսին, և որ սույն տեղեկությունն ինքը ստացել է ականատես վկաներից:
«Ոչ ոք չի կարող մեջքին դնել ու տանել»
Ինչ վերաբերում է Մշակութային ու բնական հարստությունների պահպանման խորհրդի Դիարբեքիրի շրջանային տնօրինության իրավասուներին, ապա վերջիններս եկեղեցու կորած դռան կապակցությամբ հանդես եկան հետևյալ մեկնաբանությամբ. «Ինչպես որ նշել ենք նաև մեր պատասխան գրության մեջ, երբ եկեղեցին վերցվել է մեր պահպանման տակ, նման դուռ գոյություն չի ունեցել: Առանց այդ էլ անվտանգ չլինելու պատճառով հնարավոր չէ այդ շրջանն այցելել: Մեր ընկերները մի անգամ են գնացել այդ լեռը ու պաշարված մնացել: Հայկական միությունն իհարկե կարող է դատական հայց հարուցել` գործի առնչությամբ: 300-500 կիլոգրամանոց դուռը ոչ ոք չի կարող մեջքին դնել ու տանել»:
Գոյությունը հիշող մարդ չկա
Բաթմանի մշակույթի և զբոսաշրջության նահանգային տնօրինություն. «Այդ դռան կապակցությամբ Ազիզ Դաղջըն դիմում է ներկայացրել Մշակույթի նախարարություն: Գավառապետարանը հարցն ուղարկել է գավառի ժանդարմերիայի հրամանատարություն: Վերջինս էլ հետաքննություն է կատարել գյուղերում, որի արդյունքում պարզվել է, որ մարդ չկա, որը հիշի, թե եկեղեցին նման դուռ է ունեցել: Իրադրության մասին հաղորդվել է արձանագրության միջոցով»:
Դորուք Չաքար-Անկարա
12.10.2011
«Աքշամ» օրաթերթ
Leave a Reply