Հայաստանում Ֆրանսիայի նախագահ Նիկոլա Սարկոզիի հնչեցրած հայտարարություններից հետո պաշտոնական Անկարան չի լռում: Հերթական քննադատությունը Սարկոզիի հասցեին հնչեցրել է այս անգամ արդեն Թուրքիայի վարչապետ Ռեջեփ Թայիփ Էրդողանը:
Ելույթ ունենալով երկրի խորհրդարանում՝ նա հայտարարել է, որ Ֆրանսիայի նախագահի պահվածքը վայել չէ քաղաքական առաջնորդին: “Քաղաքականությունը, նախեւառաջ, ազնվություն է պահանջում”,- ասել է Թուրք վարչապետը` մեղադրելով Սարկոզիին Հայաստանում, Ֆրանսիայիում եւ Թուրքիայում “տարբեր լեզուներ օգտագործելու” մեջ:
“600,000 հայ եւ 500,000 թուրք է ապրում Ձեր երկրում: Մյուս կողմից` առանձին հարաբերություններ ունեք Թուրքիայի հետ: Սակայն եթե չեք կարող տեսնել իրականությունը, ընտրում եք երկակի դիրքորոշում միայն նրա համար, որ այս երկու խմբերից եկող տնտեսական ներուժը տարբեր է, ներողություն, բայց Թուրքիան տորթի կտոր չէ: Պետական առաջնորդի կոչումը կրող պաշտոնյան պետք է մտածի հաջորդ սերունդների, այլ ոչ թե գալիք ընտրությունների մասին”,- ասել է նա:
Հիշեցնենք, որ Հայաստան կատարած այցի ժամանակ Նիկոլա Սարկոզին հայտարարել էր, որ եթե Թուրքիան առաջիկայում չճանաչի Հայոց ցեղասպանությունը, Ֆրանսիան կընդունի Ցեղասպանության հերքումը քրեականացնող օրինագիծ:
Էրդողանից առաջ Ելիսեյան պալատի ղեկավարի հասցեին սուր քննադատական հայտարարություններով հանդես էին եկել նաեւ արտգործնախարար Ահմեդ Դավութօղլուն ու ԵՄ անդամակցության հարցերով Թուրքիայի գլխավոր բանագնաց Էգեմեն Բաղըշը:
Leave a Reply