Դարձյալ մի ժեստ` ուղղված փոքրամասնություններին

Վաքըֆների գլխավոր տնօրինության համակարգմամբ տարվող աշխատանքների շրջանակներում որոշում է կայացվել ողջ երկրով մեկ վերանորոգել պաշտամունքի բազմաթիվ վայրեր` եկեղեցուց մինչև վանք ու սինագոգ:

Համայնքային վաքըֆներին պատկանող գույքերը վերադարձնելու մասին որոշման ընդունումից հետո մի ժեստ ևս արվեց` ուղղված ոչ մուսուլման քաղաքացիներին: Որոշում կայացվեց վերանորոգել բազմաթիվ պաշտամունքի վայրեր` եկեղեցիներից ու վանքերից մինչև սինագոգներ: Դրանց շարքում է նաև Դիարբեքիրի Սուր քաղաքի հայ կաթոլիկ եկեղեցին: Որոշ ժամանակ առաջ ավարտին էր հասցվել դարձյալ Սուրում գտնվող հայ բողոքական եկեղեցու վերանորոգումը: Այս անգամ էլ վերականգնվում է կաթոլիկների օգտագործած եկեղեցին: Վերանորոգված մեկ այլ պաշտամունքի վայր է Մեծ սինագոգ կոչվող Էդիրնեի (Ադրիանապոլիս) կենտրոնական սինագոգը:

Բարեկարգվում է նաև Այա Մարինա եկեղեցին

Վաքըֆների գլխավոր տնօրինության համակարգմամբ տարվող աշխատանքների շրջանակներում այն վայրերի շարքում, որոնք որոշվել է վերանորոգել, ուշադրություն են գրավում Այվալըք խունտա կղզում գտնվող Թաքսիյարհիս եկեղեցին, ինչպես նաև` ԵՄ-ի` Առաջընթացի մասին զեկույցներում հաճախ շոշափվող Գյոքչե կղզու եկեղեցին ու վանքերը: Այս շրջանակում բարեկարգվելու են նաև Այա Մարինա հույն ուղղափառ եկեղեցին ու Յըլդըզ գյուղի վանքը: Հաղորդվել է, որ կատարվող աշխատանքների շրջանակներում ավարտին են հասցվել Դարդանելի Գյոքչե կղզում գտնվող Այա Նիկոլա եկեղեցու, Վաքըֆների խորհրդի որոշմամբ` Ստամբուլի ասորական կաթոլիկ վաքըֆին հատկացված Հաթայի Իսքենդերուն քաղաքում գտնվող ասորական կաթոլիկ եկեղեցու, դարձյալ Վաքըֆների խորհրդի որոշմամբ` Անթաքիայի հույն կաթոլիկ եկեղեցու վաքըֆին հատկացված Իսքենդերունի հույն կաթոլիկ եկեղեցու և Դիարբեքիրի Սուր քաղաքի հայ բողոքական եկեղեցու վերանորոգումները:

Ծախսերը հոգալու են Վաքըֆների բյուջեից

Կատարվող բարեկարգումներն իրականացվում են կապալառության միջոցով: Ինչ վերաբերում է ծախսերին, ապա դրանք հոգում են Վաքըֆների գլխավոր տնօրինության բյուջեից: Կառավարությունը տարիներ տևած բանավեճերից հետո կրոնական արարողությունների համար բացել է Վանում գտնվող Աղթամարի եկեղեցին և Տրապիզոնում գտնվող Սյումելա վանքը, ինչպես նաև օրենքի դրույթում մի որոշում է հրապարակել համայնքային վաքըֆների` 1936 թ. հռչակագրով գրանցված անշարժ գույքերի և հետագայում ձեռք բերված անշարժ գույքերի առնչությամբ սեփականության խնդիրների լուծման նպատակով:

Հաքքը Քուրբան

10.10.2011

«Աքշամ» օրաթերթ