Տիգրան Եկավյանը հերքում է թուրքական մամուլի զրպարտանքները

Ես` քաղաքացիությամբ ֆրանսիացի-շվեյցարացի, անկախ լրագրող Տիգրան Սարգիս Արշակ Եկավյանս, հերքում եմ ձեր կայքէջում հայտնված (http://www.azg.am/AM/2011100711) իմ` Թուրքիայում բանտարկված լինելու մասին տեղեկատվությունը:

Հոկտեմբերի հինգին թուրքական մամուլը ներկայացրել եւ հրատարակել է ինձ վերաբերող կեղծ մեղադրանքներ (պնդումներ) թուրքական Star, Yeni Shafak, Sabah, Yeni Akit, Haber Monitor թերթերում, որոնք ոչ միայն տպագրել են իմ անձնագրերի պատճենները, այլ նաեւ մեղադրել ինձ PKK կազմակերպության հետ կապեր ունենալու մեջ:

«Երկիր Եվրոպա» հասարակական կազմակերպության կողմից կազմակերպված Թուրքիայի քաղաքացիական հասարակության հետ հանդիպման նախագծի շրջանակներում ես մասնակցել եմ մի քանի հանդիպումների Ստամբուլում եւ Դիարբեքիրում: Դիարբեքիրում որպես դիտորդ ներկա եմ գտնվել Միջագետքի սոցիալական ֆորումի բացմանը: Իմ` Դիարբեքիրում գտնվելու ընթացքում (սեպտեմբերի 18-23-ը) ես տարբեր հանդիպումներ եմ ունեցել քաղաքացիական հասարակության տեղական ներկայացուցիչների, երիտասարդական միությունների հետ, որոնցից ոմանք զբաղվում են նաեւ մարդու իրավունքների պաշտպանության հարցերով: Ահա թե ինչու ես առավել մեծ համոզվածությամբ եմ հերքում թուրքական մամուլում ներկայացված այդ մեղադրանքները, որոնք զրպարտում են թե՛ իմ պատիվը, թե՛ իմ մասնագիտությունը:

Առավել տեղեկության համար ձեզ կհրավիրեմ հետեւյալ աղբյուրը ստուգելու, որ նշում է պատահած ապատեղեկատվությունը` http://www.yerkirmedia.am/?act=news&lan=hy&id=2974:

ՏԻԳՐԱՆ ԵԿԱՎՅԱՆ

«ԱԶԳ» ՕՐԱԹԵՐԹ #180

 11-10-2011