Թուրքիայում ձերբակալել են Հայոց ցեղասպանությունը ճանաչող հայտնի հրատարակչի որդուն

Թուրքիայում ձերբակալվել է գրող, հրատարակիչ, իրավապաշտպան, «Բելգե» հրատարակչատան տնօրեն Ռագըփ Զարաքոլուի որդին՝ Դենիզ Զարաքոլուն։

Ինչպես տեղեկացնում է bianet կայքը, «Բիլգի» համալսարանի քաղաքագիտության բաժնի ասպիրանտ Դենիզ Զարաքոլուն ձերբակալվել է Քրդստանի բանվորական կուսակցության (PKK) քաղաքային թևը հանդիսացող «Քրդստանի համայնքների միության» (KCK) դեմ իրականացված գործողության ժամանակ։

Որդու ձերբակալության փաստի քննադատությամբ հանդես է եկել Ռագըփ Զարաքոլուն։ Նա նշել է, որ իր որդուն ձերբակալել են «Խաղաղություն և ժողովրդավարություն» կուսակցության քաղաքական ակադեմիայում քաղաքագիտություն դասավանդելու համար։
Զարաքուլուն Թուրքիայում Հայոց ցեղասպանության փաստի մերժողականության դեմ պայքար մղող ամենահայտնի մտավորականներից է։ Իր այդ գործունեության համար Զարաքոլուն թուրքական իշխանությունների կողմից պարբերաբար հետապնդվել է ՔՕ 301-րդ հոդվածի հատկանիշներով։ Ֆրանց Վերֆելի «Մուսա լեռան 40 օրը» պատմավեպը թարգմանելու և Ստամբուլում իրեն պատկանող «Բելգե» տպարանում հրատարակելու համար 2007թ. «թուրքական ինքնությունը վիրավորելու» մեղադրանքով դատապարտվել է 6 ամսվա ազատազրկման։ Զարաքոլուն 301 հոդվածի հատկանիշներով է դատապարտվել նաև Ջորջ Ջերջյանի՝ Հայոց ցեղասպանությանը նվիրված «Ճշմարտությունը մեզ կազատագրի» գիրքը թուրքերենով տպագրելու համար:

Հիշեցնենք, որ ամիսներ առաջ Ռագըփ Զարաքոլուն Երևանում ստացել է «Հակոբ Մեղապարտ» մեդալ։

08.10.11

Tert.am