Ահմեդ Դավութօղլու. Թուրքիային խորհուրդ տվողները նախ թող նայեն հայելու մեջ

Թուրքական «Ջիհան» գործակալության փոխանցմամբ~ Թուրքիայի Եվրամիության հարցերով նախարար, ԵՄ անդամակցության հարցով գլխավոր բանագնաց Էգեմեն Բաղըշն անդրադառնալով Հայոց ցեղասպանության վերաբերյալ Ֆրանսիայի նախագահ Նիկոլա Սարկոզիի արած հայտարարություններին ասել է, որ նա չպետք է հանդես գա որպես պատմաբան։ 

«Ե՛վ Եվրոպայի, և՛ Ֆրանսիայի, և՛ աշխարհի համար ավելի լավ կլինի, եթե Սարկոզին մտածի Եվրամիության ապագայի, իր երկիրը տնտեսական ծանր վիճակից փրկելու մասին, այլ ոչ թե հանդես գա որպես պատմաբան»,– ասել է նա: 

Նրա խոսքերով, Սարկոզիի հայտարարությունն ընտրությունների նախաշեմին շահարկումներով զբաղվելու փորձ է:

Բացի այդ, Ֆրանսիայի նախագահի հայտարարությունը քննադատել է նաև Թուրքիայի արտգործնախարար Ահմեդ Դավութօղլուն: Նրա խոսքերով, Սարկոզիի հայտարարությունները բացասաբար են անդրադառնալու Հայաստանի և Թուրքիայի միջև հարաբերությունների կարգավորման գործընթացի վրա, որը, չնայած որոշ թերությունների, այնուամենայնիվ, ընթացքի մեջ է: 

«Մենք միշտ առերեսվում ենք սեփական պատմության հետ։ Այդ հարցում մեր դիրքորոշումը հստակ է։ Հայտարարել ենք, որ 1915թ. ցավը մեր բոլորինս է։ Այդ հարցում անհանգստանալու ոչինչ չունենք։ Սակայն Թուրքիային սեփական անցյալի հետ առերեսման խորհուրդներ տվողները լավ կլինի՝ նախ նայեն հայելու մեջ»,- ասել է Դավութօղլուն:

Հոկտեմբերի 7, 2011

http://www.emedia.am/arm/article/6308/