Վախճանվել է Սթիվ Ջոբսը

Այս գիշեր մահացել է Apple ընկերության հիմնադիր և նախկին ղեկավար Սթիվ Ջոբսը։

Ինչպես տեղեկացնում է Associated press–ը, Ջոբսը 56 տարեկան հասակում մահացել է ենթաստամոքսային գեղձի քաղցկեղից։

«Այսօր ողջ աշխարհը կորցրեց հանճարեղ և հրաշալի մի մարդու, իսկ ում բախտ է վիճակվել անձամբ ճանաչել և աշխատել Սթիվի հետ՝ ընկերոջ և ուսուցչի։ Սթիվ Ջոբսն իրենից հետո թողել է մի ընկերություն, որը կարող էր հիմնադրել միայն նրա մասշտաբի տեր մարդը։ Նրա հոգին միշտ կղեկավարի մեր գործողությունները»,– ասվում է Apple–ի տարածած հաղորդագրությունում։

Նշենք, որ առաջիկայում լույս կտեսնի Սթիվ Ջոբսի կենսագրությունը՝ iSteve: The Book of Jobs։ Գրքի հեղինակը ամերիկյան CNN հեռուստաընկերության նախկին գլխավոր տնօրեն և ամերիկյան Time ամսագրի խմբագիր Ուոլթեր Այսաքսոնն է:

Սթիվ Ջոբսը ծնվել է 1955թ. ԱՄՆ Կալիֆոռնիա նահանգի Մաունթին Վյու փոքր քաղաքում։ Նրա կենսաբանական ծնողները Ջոանա Շիբլը և Աբդուլֆաթահ Ջոն Ջանդալին են (գաղթականներ են Սիրիայից)։ Ջոբսին, սակայն, մեկ շաբաթականից մեծացրել և դաստիարակել են ազգությամբ հայ Կլարան (ազգանունը՝ Հակոբյան) և ամերիկացի Փոլ Ջոբսերը։ «Իմ ծնողները նրանք են»,– ասում էր Ջոբսը։

Կլարան ԱՄՆ է գաղթել Հայոց ցեղասպանությունից հետո Թուրքիայի Մալաթիա նահանգից։ Գրքում նշվում է, որ Կլարայի հայրը Լուիս Հակոբյանը, ծնվել է Մալաթիայում 1894թ. իսկ մայրր՝ Վիկտորիա Արթինյանը՝ 1894թ. Իզմիրում։

06.10.2011

Tert.am