Պաշտոնական այցով Հայաստան ժամանած Լիբանանի խորհրդարանի պատվիրակությունը’ խորհրդարանի նախագահ Նաբիհ Բըրրիի գլխավորությամբ, այսօր այցելեց Հայոց ցեղասպանության անմեղ զոհերի հիշատակը հավերժացնող Ծիծեռնակաբերդի հուշահամալիր: Լիբանանի պատվիրակությանն ուղեկցում էր Հայոց ցեղասպանության թանգարան- ինստիտուտի տնօրեն Հայկ Դեմոյանը:
Լիբանանի խորհրդարանի նախագահը ծաղկեպսակ դրեց Հայոց ցեղասպանության անմեղ զոհերի հիշատակը հավերժացնող հուշահամալիրում, հարգեց նրանց հիշատակը անմար կրակի մոտ: Ն. Բըրրին նաեւ այցելեց Հայոց ցեղասպանության թանգարան-ինստիտուտ, որտեղ ծանոթացավ ցուցադրվող նյութերին, ապա գրառում թողեց պատվավոր հյուրերի հուշամատյանում, որում մասնավորապես ասվում էր. «Ցավ եմ ապրում հայ ժողովրդի ողբերգության համար: Այս զոհերը իրենց հասակով արմատ են գցել հայոց հողի մեջ: Եվ այդ արմատների վրա էլ դեռեւս կանգուն է Հայաստանը»: Լրագրողների հետ զրույցում էլ Լիբանանի խորհրդարանի նախագահը նշեց, որ առաջին անգամ չէ Հայաստանում եւ ամեն անգամ, Ծիծեռնակաբերդում գտնվելով, նույն ցավն է ապրում:
Ն. Բըրրին եղեւնի տնկեց Հայոց ցեղասպանության անմեղ զոհերի հիշատակը հավերժացնող հուշամահալիրի հարեւանությամբ գտնվող «Հուշերի պուրակում»:
3 Հոկտեմբեր, 2011
http://armenpress.am/arm
Leave a Reply