Եվրոմիության հանձնաժողովը ասել է, որ գոհ է Թուրքիայի` փոքրամասնությունների վաքֆերի ունեցվածքը վերադարձնելու վերաբերյալ «Resmi Gazete» պաշտոնաթերթում հրապարակած օրենքից:
Եվրոհանձնաժողովի ընդլայնման և եվրոպական հարևանության պատասխանատու անդամ Շտեֆան Ֆյուլեն հարցի վերաբերյալ հանդես է եկել գրավոր հայտարարությամբ: Ֆյուլեն, հանձնաժողովի անդամների ուշարդորությունը հրավիրելով վարչապետ Ռեջեփ Թայիփ Էրդողանի՝ ոչ մուսուլման փոքրամասնությունների համայնքների ներկայացուցիչների հետ իֆթարի ճաշկերույթ-հանդիպման կարևորության վրա, հայտնեց, որ սա կրոնական ազատության հանդեպ հարգանքի դրական ցուցանիշ է: Եվրոխորհրդարանի անդամ, Թուրքիայի հարցով ԵԽ զեկուցող Ռիա Օումեն-Ռոյթեն ասել է, որ Թուրքիայի կառավարության փոքրամասնություններին պատկանող ունեցվածքը հետ վերադարձնելու քայլը գնահատանքի է արժանի: Օումեն-Ռոյթեն հայտնելով, որ շաբաթվա վերջին կառավարության հրապարակած օրենքի ուժ ունեցող որոշմամբ փոքրամասնություններին պատկանող բռնագրավված անշարժ գույքը հետ է վերադարձվելու, նշեց, որ երկար սպասված այս քայլը շատ կարևոր է փոքրամասնությունների իրավունքների ընդլայնման համար:
Ռիա Օումեն-Ռոյթենը գրավոր հայտարարության մեջ հանդես է եկել մեկնաբանությամբ. «Նախկինում պատրաստած զեկույցներիս մեջ Եվրոխորհրդարանը կոչ է արել Թուրքիայի կառավարությանը, որպեսզի ճանաչի կրոնական խմբերի բոլոր իրավունքները: Միևնույն ժամանակ Մարդու իրավունքների եվրոպական դատարանը ցանկացել է, որ իրավունքի և որոշումների շրջանակներում այս խմբերը առանց որևէ ճնշման կարողանան գործել: Շատ ուրախ եմ Թուրքիայի կառավարության այս կառուցողական քայլի համար»:
Օումեն-Ռոյթենը նշել է, որ օրենքի ուժ ունեցող որոշումը շատ կարևոր քայլ է, սակայն իրենք սպասում են ավելիին` մատնանշելով Հեյբելիա կղզու վանական դպրոցն ու Մարդինի Մոր Գաբրիել վանքը:
Leave a Reply