Անգարան պէտք է հասկնայ, որ արձանագրութիւնները անժամկէտ հնարաւորութիւն չեն. Սերժ Սարգսեան

Հայ-թրքական յարաբերութիւններու կարգաւորման նախաձեռնութիւնը բարձրացուց Հայաստանի միջազգային հեղինակութիւնը եւ ցրուեց նոր ու ժամանակակից Թուրքիոյ մասին պատրանքները: Այս մասին այսօր ըսած է նախագահ Սերժ Սարգսեան` Կ. Դէմիրճեանի անուան մարզահամերգային համալիրին մէջ մասնակցելով 30-31 Օգոստոսին իրականացուող ՀՀ արտաքին գործոց նախարարութեան կեդրոնական աշխատակազմի եւ արտերկրի մէջ ՀՀ դիւանագիտական ներկայացուցչութիւններու ղեկավարներու խորհրդակցութեան:

«Շատերին կարող է թուալ, թէ մենք պէտք է ափսոսանք Հայաստան-Թուրքիա յարաբերութիւնները կարգաւորելու նախաձեռնութիւն դրսեւորելու համար, քանի որ Թուրքիան հրաժարուեց իր պարտաւորութիւններից, իսկ մենք հսկայական քաղաքական քափիթալ ծախսեցինք: Կարծում եմ` այս լսարանում ներկաները հասկանում են, որ այդ նախաձեռնութիւնը բարձրացրեց Հայաստանի միջազգային հեղինակութիւնը եւ ցրեց նոր ու ժամանակակից Թուրքիայի մասին մեր գործընկերների պատրանքները` բացայայտելով հայերիս համար պատմական փորձով ճանաչելի քաղաքականութեան արդի դրսեւորումները:

«Այդուհանդերձ, մենք հաւատարիմ ենք Հայաստան-Թուրքիա յարաբերութիւնները առանց նախապայմանների կարգաւորելու մեր ուղուն եւ դիրքորոշմանը: Թուրքիան պէտք է իր մէջ ուժ գտնի յարգելու իր իսկ կողմից ստանձնած պարտաւորութիւնները` տուրք չտալով իրեն ժամանակակից տարածաշրջանային պետութիւն համարողին պատիւ չբերող պահանջներին:

«Բայց թուրքական կողմը պէտք է հասկանայ նաեւ, որ այս արձանագրութիւնները բաց, անժամկէտ հնարաւորութիւն չեն: Մեր բարեկամներից շատերը մեզ խորհուրդ էին տալիս սպասել մինչեւ Թուրքիայի խորհրդարանական ընտրութիւնները: Այնպէս որ առաջիկայ մի քանի ամիսների ընթացքում մենք կը տեսնենք` արդեօ՞ք խորհրդարանական ընտրութիւններից յետոյ Թուրքիայում առկայ է մօտեցումների փոփոխութիւն, թէեւ անկեղծօրէն ասած` անցած երկու ամիսները լաւատեսութեան հիմքեր չեն տուել: Ըստ այդ դիտարկումների` մենք կ’որոշենք նաեւ արձանագրութիւնների ուղղութեամբ մեր յետագայ քայլերը»,- ըսած է Սերժ Սարգսեան:

Tert.am

ՀՀ Նախագահի խօսքին ամբողջութիւնը՝ http://www.president.am/events/news/arm/?id=1745