Նեշե Քարանֆիլ
Փոքրամասնությունների գույքերի վերադարձը կանոնակարգող որոշումն արձագանքների տեղիք է տվել: Վերադարձների հարցում վերջին խոսքը պատկանելու է 15 անդամից բաղկացած Վաքըֆների խորհրդին (Vakıflar Meclisi):
Փոքրամասնությունների բռնագրավված վաքըֆների շարքում է նաև Բալըքլըի հունական հիվանդանոցի վաքըֆը:
Անկարա- Փոքրամասնությունների գույքերի վերադարձի հարցում վերջնական որոշումը կայացնելու է Վաքըֆների խորհուրդը: 15 հոգուց կազմված սույն խորհրդում ներգրավված է նաև 2008 թ. անդամ ընտրված Լաքի Վինգասը: Վերջինս նշելով, թե Վաքըֆների խորհուրդը գերագույն ատյան է, հայտնեց նաև, որ որոշումները կայացվելու են ձայների մեծամասնությամբ: Վինգասը հիշեցնելով, թե դիմումի համար սահմանված է 12 ամիս ժամանակ, հայտնեց, որ կարելի է դիմել 12 ամսվա ընթացքում:
Վինգասը շեշտելով, թե այս քայլը «շատ մեծ» է, հայտնեց նաև, որ երբ 2008 թ. հրապարակվեց օրենքը, վերջինիս թերի մնացած կողմերը հաղթահարվեցին որոշման շնորհիվ: Վինգասը նշելով, որ 2008 թ. ընդունված օրենքից հետո վերադարձվել է մոտ 150-200 անշարժ գույք, և որ այս կարգավորմամբ էլ համայնքներին կանցնի մոտավոր թվով 40-50 գերեզմանոցների գույք, հայտնեց նաև, թե այս գերեզմանոցների մեծ մասը գտնվում են Ստամբուլում և շատ արժեքավոր հողատարածքներ են:
Ինչպե՞ս է կատարվելու վերադարձը
Որոշումը շաբաթ օրը հրապարակվել է Թուրքիայի պաշտոնական թերթում (Resmi Gazete): Այսինքն` կարգավորումը ներկա պահին արդեն օրենքի ուժ է ստացել, սակայն անհրաժեշտ է մի կանոնագիր հրապարակել` օրենքի գործադրման կերպի մասին: 3 հոգու փոխանցված գույքերի կապակցությամբ Ֆինանսների նախարարությունը սակագին է հաստատելու, գինն էլ վճարվելու է Վաքըֆների գլխավոր վարչության կամ Գանձարանի կողմից: Վաքըֆների խորհուրդը բաղկացած է 15 անդամներից: Վաքըֆների գլխավոր տնօրինության կազմակերպչական մարմիններից մեկը հանդիսացող Վաքըֆների խորհուրդը տվյալ պահին ունի միայն 13 անդամ: Խորհրդի նախագահն է Վաքըֆների գլխավոր տնօրեն Ադնան Էրթեմը: Տնօրենի տեղակալներ Բուրհան Էրսոյը, Ալի Հյուրաթան և իրավական գծով առաջին խորհրդական Օյա Էրջիլն էլ խորհրդի անդամներից են: Վինգասը հայտնեց, թե ինքը խորհրդի անդամ է դարձել 2008 թ., և որ իր 3 տարվա պաշտոնի ժամկետը կլրանա այս տարվա վերջին:
«Օրենքին հարմարվեցված մի բռնագրավման» պատմությունը
«Ակօս» շաբաթաթերթի վերջին համարում ներկայացվում է 1930-ական թվականներին բռնագրավված Սուրբ Հակոբ գերեզմանոցի պատմությունը: Ըստ հրապարակման` Էլմադաղում (շրջան Ստամբուլում-Ակունքի խմբ.) գտնվող Divan ու Hyatt հյուրանոցների, Թուրքիայի պետական ռադիոյի (TRT Radyosu) և Զինվորական թանգարանի (Askeri Müze) գտնված վայրում անցյալում եղել է Փանգալթըի (թաղամաս Ստամբուլում-Ակունքի խմբ.) հայկական գերեզմանատունը: Կանունին (օսմանյան սուլթան Սուլեյման Կանունի /1495-1566/-Ակունքի խմբ.) այդ տարածքը տվել է հայերին` իրեն մահից փրկած վանեցի որսորդ Մանուկ Քարասեֆերյանի խնդրանքով: Սույն հողատարածքը հարյուրամյակներ շարունակ օգտագործվել է որպես գերեզմանոց, սակայն 1930-ական թվականներին զավթվել է քաղաքապետարանի կողմից, և բռնագրավումը «հարմարեցվել է օրենքին»:
29.08.2011
Ռադիկալ
Leave a Reply