Եկեղեցիների ավերումը Թուրքիայի պետական քաղաքականության մաս է մինչ օրս

Թուրքիան ավերել է քրիստոնեական եկեղեցիները ողջ 20-րդ դարի ընթացքում և շարունակում է 21-րդ դարում: Միայն 1970-80-ական թվականներին Թուրքական զինվորականությունը ոչնչացրել է շուրջ 500 քրիստոնեական եկեղեցիներ: Եթե Օսմանյան կայսրության վերջին ժամանակաշրջանում փաստ են հայերի կոտորածները, ապա քրիստոնեական եկեղեցիների և այլազգիների մշակույթի վերացման քաղաքականությունը պետական մակարդակի վրա է բարձրացվել միայն Թուրքիայի հանրապետության օրոք:

Այն, որ մինչև 1915թ. առկա շուրջ 2000 հայկական եկեղեցիներից այժմ մնացել են կանգուն և խոնարհված միայն երեք հարյուրյակը, ապացուցելու կարիք չունի: Թուրքիայի պետական կառավարման համակարգի անմիջական մասնակցությամբ (հիմնականում զինվորականություն)  և թողտվությամբ 1920-1960 թվականներին ոչնչացվել կամ խոնարհվել է 1500-ից ավելի հայկական եկեղեցիներ: Սակայն այդ քաղաքականությունը միայն հայերի նկատմամբ չի իրականացվել: Այն կազմել է քրիստոնեական մշակույթի ոչնչացման պետական ծրագրի միայն մեկ ուղղությունը:

Հույն հետազոտողների տվյալներով 1970-80 թվականներին Կիպրոսի հյուսիսային հատվածում ոչնչացվել կամ խոնարվել են շուրջ 500 եկեղեցիներ:  

ԵԱՀԿ –ի կողմից հրապարակված  “Հյուսիսային Կիպրոսում մշակութային արժեքների ոչնչացում և միջազգային իրավունքի խախտում” զեկուցագրում  նշված է, որ  28 եկեղեցիներ վերածվել են զինվորական հոսպիտալների: Իսկ 2010թ-ին Կիպրոսի արքեպիսկոպոս Քրիստոսթոմոսը Հռոմի պապին հղած իր նամակում գրում է, որ 1974թ-ին կղզու հյուսիսային հատվածը թուրքական զինվորական ուժերի կողմից գրավելուց հետո, այնտեղ նրանք բնակեցրին Անատոլիայի խորքերից բերված բնակիչներին և տեղահանեցին քրիստոնյա բնակիչներին: Մինչ օրս, տեղեկացրել է  Քրիստոսթոմոսը, թուրքերը կղզու հյուսիսային հատվածում ոչնչացրել և խոնարհել են շուրջ 500 եկեղեցիներ: Տարհանելով քրիստոնյա բնակչությանը և ոչնչացնելով եկեղեցիներն ու մշակութային արժեքները` Թուրքիան պետական բարձր մակարդակով փորձում է լիովին “թուրքացնել” այդ տարածքը էթնիկ զտումների ու կրոնա-մշակութային հիշողության ջնջման  քաղաքականության շնորհիվ: Նույն քաղաքականությունը Թուրքիան իրականացրել է նաև իր տարածքում հայերի , հույների, ասորիների և այլ ազգերի նկատմամբ: Մի՞թե պարզ չէ Եվրոպայի և ԱՄՆ-ի համար, որ 21-րդ դարում էլ շարունակվում է նույն քաղաքականությունը, եթե ԵԱՀԿ-ն ինքն է փաստում, որ 28 եկեղեցիներ այսօր էլ ծառայում են որպես զինվորական հոսպիտալներ և պղծվում են ամեն օր:

 Armweeklynews.am 27.08.11