Քրդերը դիմելու են միջազգային դատարան` ընդդեմ Թուրքիայի

Հյուսիսային Իրաքի Քրդստանի դաշնային ինքնավար տարածքը փորձում է ելք գտնել ստեղծված իրավիճակից, երբ շարունակվում են քրդական բնակավայրերի ռմբակոծումները և առկա է թուրքական ուժերի կողմից ցամաքային ռազմական գործողություննների հնարավորությունը: Օգոստոսի 25-ին Մեսութ Բարզանիի կոչով նիստ է գումարել Քրդստանի խորհրդարանը: Խորհրդարանը քննարկել է քրդերի դեմ թուրք-պարսիկ-արաբ դաշնակցության ձևավորումը և կառավարությունից պահանջել Թուրքիային պատախանատվության կանչել Պատերազմական հանցագործությունների միջազգային դատարանում:

Թուրքական օդուժի կողմից մեկ շաբաթ տևողությամբ ռմբահարումների հետևանքով քաղաքացիական զոհերի թիվը կազմել է 12 անձ: Քրդստանի Վերթե, Սիդեկա, Փեժդեր բնակավայրերում իրենց տները լքել են շուրջ 2200 ընտանիքներ: Քրդական խորհրդարանն իր հայտարարության մեջ նշել է, որ թուրք-պարսիկ-արաբ դաշնության հիմնական նպատակը ոչ թե PKK-ն և PJAK-ն են, այլ` քուրդ ժողովուրդը և քուրդ ինքնությունը: Քրդական քաղաքական գործիչները փաստում են , որ քուրդ ժողովուրդը մնացել է առանց դաշնակիցների  տարածաշրջանում:

 Armweeklynews.am 26.08.11