Նուրրեթին Սոֆի. Քրդստանը Էրդողանի համար գերեզման կդառնա

Այն բանից հետո , երբ Ստամբուլի դատարանը  Օջալանի փաստաբաններին մեկ տարով զրկեց իրենց պաշտպանյալի հետ հանդիպումներից, պարզ դարձավ , որ թուրքական իշխանությունները որոշել են խզել կապը Օջալանի և Կանդիլի զինյալների միջև, թույլ չտալով , որ  Օջալանը հնարավորություն ունենա ղեկավարել նրանց գործողությունները: Դրան հաջորդած լուրերն այն մասին, որ Իրանը ձերբակալել կամ հսկողության տակ է պահում PKK-ի հրամանատար Կարայըլանին, կարող էին այնպիսի տպավորություն ստեղծել, որ քրդերի համար ամենապատասխանատու պահին “խաղից դուրս “ են մնում Օջալանը և իր հիմնական գաղափարակիցները: Այս ճանապարհով Թուրքիան փորձում էր քրդական քաղաքական էլիտային դուրս բերել Օջալանի ազդեցության դաշտից և թույլ տալ ինքնուրույն որոշումներ կայացնել:

Եվ ահա, ճիշտ ընտրված ժամանակին, հրապարակային գործունեություն է սկսում ծավալել Ժողովրդի պաշտպանության ուժեր (HPG ) զիված խմբավորման հրամանատար Նուրրեթին Սոֆին: Սոֆին արմատներով սիրիացի քուրդ հրամանատար է, որը 2009թ-ին ստանձնել է Ժողովրդի պաշտպանության ուժեր (HPG ) զիված խմբավորման ղեկավարությունը,  փոխարինելով նույնպես սիրիացի Բահոզ Էրդալին (թեև թուրքական մամուլն անհիմն պնդում է, որ Սոֆին և Էրդալը սիրիահայեր են ),ինչն արդյունք էր քրդական զինված խմբավորումների մեջ առկա որոշակի հակասությունների, ինչպես նաև զազա-քուրդ փոխադարձ ժամանակավոր անվստահության: Նուրրեթին Սոֆին մոլի օջալանական է և Օջալանի գաղափարախոսության հետևորդը: Հրապարակում հայտնվում է նոր դեմք, որը հայտ է ներկայացնում առաջնորդել քրդական ուժերը, հիմք ունենալով միմիայն Օջալանի գաղափարախոսությունը, թեև որոշ վերլուծաբաններ պնդում են, որ Սոֆին մարմնավորում է նաև “քուրդ աթեիզմը”: ANF-տեղեկացմամբ,  Նուրրեթին  Սոֆին ընդարձակ հարցազրույց է տվել գերմանական “Նոր անկախ քաղաքականություն” ամսագրին , որտեղ, եթե համառոտ ներկայացնենք , ասել է  հետևյալը.

-Վերջին իրադարձությունները ցույց տվեցին, որ Էրդողանը և AKP-ն դեն նետեցին “քրդական հարցի բարեփոխիչների” դիմակը և ցույց տվեցին իրենց ազգայնամոլ դեմքը:

-Մենք մեր գործողությունների շնորհիվ գաղտնազերծեցինք թուրք իշխանության կողմից քրդական ցեղասպանության իրականացնելու ծրագիրը:

-Էրդողանը մուսուլմանական քաղաքակրթությանը ոչ վայել գործողություններ է իրականացնում: Նա այնքան է մուսուլման, որքան Նեմրութ լեռան քարացած թագավորները: Քուրդ ժողովուրդը, ով Խաչակրաց արշավանքից այս կողմ արժանապատվորեն ներկայանում է Մերձավոր արևելքում, Էրդողանից չէ, որ պիտի կրոնի դասեր առնի:

-Պայքարելու ենք մինչև վերջ և պաշտպանելու ենք մեր ժոոովրդին: Սա Էրդողանի վերջին պատերազմն է լինելու:  Քրդստանը Էրդողանի համար գերեզման կդառնա:

Armweeklynews.am 25.08.11