Իռլանտացիներու եւ Սպանացիներու Նախնիները Արեւմտեան Հայաստանէն են. Հետազօտութիւն

Բրիտանիոյ մէջ վերջերս իրականացուած հետազօտութիւնը կը հերքէ այն վարկածը, որուն համաձայն ժամանակակից եւրոպական տղամարդոց մեծ մասը կը սերին 5–10 հազար տարի առաջ Անատոլիայէն գաղթած հողագործներէն: Նոր տուեալները կը հաստատեն այն պնդումները, որ ներկայ եւրոպացի տղամարդոց զգալի մասը կը սերի որսորդ բնիկ եւրոպացիներէն, որոնք ապրած են քարէ դարուն:

Հետազօտութեան արդիւնքները հրապարակուած են “Proceedings of the Royal Society B” ամսագրի մէջ:

Հնագիտական պեղումները ցոյց տուած են, որ ներկայ եւրոպացիներու նախնիները Եւրոպայի մէջ սկսած են ապրիլ մօտ 40 հազար տարի առաջ, իսկ 20 հազար տարի առաջ սկսած է սառցէ դարաշրջանը, որ ստիպած է անոնց գաղթել աշխարհամասի հարաւ: Կլիմայի տաքնալէն ետք անոնք վերադարձած են բնակութեան նախկին շրջանները:

Անկէ մի քանի հազար տարի անց որսորդ եւրոպացիները իւրատեսակ մշակութային շոք ապրած են, երբ անոնց մօտ Անատոլիայէն գաղթած է հողագործ բնակչութիւնը, որոնց մօտ տարբեր եղած է ինչպէս կենսակերպը, այնպէս ալ տնտեսական յարաբերութիւնները:

Բրիտանական հետազօտութեան արդիւնքով պարզուած է, որ Անատոլիայէն հողագործներուն բնորոշ քրոմոզոմը պահպանուած է ժամանակակից եւրոպական մօտ 100 միլիոն տղամարդու մօտ, որոնք կը բնակին գլխաւորաբար Սպանիոյ, Իռլանտայի ու Ուելսի մէջ:

Պէտք է նշել, որոշ գիտնականներու նախապէս կատարած ուսումնասիրութիւններուն համաձայն այդ նոյն քրոմոզոմի տարածուածութիւնը կ’աճի դէպի աշխարհամասի արեւելք շարժման զուգահեռ եւ գագաթնակէտին կը հասնի ներկայ Թուրքիոյ մէջ: Այս վերջին հետազօտութեամբ կը հաստատուի այս վարկածը, քանի որ Եւրոպայի արեւելքին ու Մերձաւոր արեւելքի մէջ բնակող տղամարդոց մօտ նշուած քրոմոզոմի մէջ էական տարբերութիւններ չկան: Ասոր մասին կը հաստատէ անոնց ընդհանրութիւնը:

Հետազօտողները սակայն, կը շեշտեն, որ դեռ չեն կրնար յստակ ըսել, թէ “այդ ժառանգական կէտը երբ սկսած է քալել Եւրոպայով”: Ատոր համար անհրաժեշտ են յաւելեալ ուսումնասիրութիւններ:

Tert.am

25.08.11