Այս անգամ էլ սկանդալի առիթ է հանդիսացել հունական եկեղեցու վերանորոգումը

Իզմիր (Զմյուռնիա) նահանգի Չեշմե շրջանում գտնվող 1874 թ. կառուցված Այոս Կոստանդինոս եկեղեցին, որը Թուրքիայի առաջին նախագահ Մուսթաֆա Քեմալ Աթաթուրքի օրոք վերածվել էր Փազարյերի անունը կրող մզկիթի, վերանորոգվել է: Այսուհետ գործելու է ոչ թե որպես մզկիթ, այլ՝ եկեղեցի:

Սակայն ինչպես և Օրդուի պատմական հունական և հայկական տների վերականգնման դեպքում, այս անգամ էլ փոքրամասնություններին պատկանող շինությունների վերանորոգումը սկանդալի ու հակազդեցության պատճառ է հանդիսացել:

Թուրքական «Զաման» պարբերականի փոխանցմամբ` Փամուքքալե համալսարանի բանասիրության ֆակուլտետի արվեստի պատմության ամբիոնի վարիչ, դոկտոր, պրոֆեսոր Քադիր Փեքթաշը սկանդալ է սարքել, որ մզկիթի վերածված հունական Այոս Կոստանդինոս եկեղեցին վերանորոգումից հետո դադարել է լինել մզկիթ:  Նա շեշտելով, որ սխալ է որպես մզկիթ օգտագործված շենքում եկեղեցու կառույց հայտնաբերել, ասել է, թե անհրաժեշտ է խուսափել մի կիրառումից, այն է` որպես մզկիթ օգտագործված կառույցը վերածել եկեղեցու, որը կառաջացնի ժողովրդի հակազդեցությունը:

Իսկ Անկախ կրոնական ծառայության արհմիության նախագահ Օմեր Լափչինը պնդել է, որ վերանորոգման հիմնական նպատակը եղել է մզկիթը եկեղեցու վերածելը: Լափչինը նշելով, որ մզկիթը մուսուլմանների աղոթավայրն է, իսկ աղոթքը մարդուն հանգստություն է պատճառում, ասել է, որ հնարավոր չէ ֆիգուրների ու արձանիկների ներկայությամբ հանգիստ աղոթել:

Իզմիրի հասարակական կազմակերպությունների պլատֆորմի ղեկավար խորհրդի նախագահ Մեհմեդ Այդողանը պահանջելով, որ գործի վերաբերյալ հետաքննություն սկսվի, ասել է, որ ոչ ոք իրավունք չունի խաղալ թուրք պատմության ու մշակույթի հետ: Հարց է առաջանում, իսկ թուրքն իրավունք ունի՞:

http://zaman.com.tr/haber.do?haberno=1172489&keyfield=6B696C697365