Թուրքիայում ձերբակալվել է Հայոց Ցեղասպանությունը հերքողներից մեկը

Հ. Ա.

«Էրգենեքոնի»-ի հետ ունեցած առնչության մեղադրանքով

Օգոստոսի 21-ին Թուրքիայում ձերբակալվել է Ստամբուլի համալսարանի պատմաբան-հետաքննող, «հեղափոխությունների պատմության մասնագետ», Մեհմեդ Փերինչեքը` Թուրքիայի Աշխատավորական կուսակցության ղեկավար Դողու Փերինչեքի որդին: Ինչպես տեղեկանում ենք ադրբեջանական Vesti.az-ից, որը մեջբերում է թուրքական լրատվամիջոցներին, ձերբակալվել են եւս 8 հոգի` ««Էրգենեքոն»-ի գործին առնչություն ունենալու մեղադրանքով»:

Թե ինչու է թուրք երիտասարդ պատմաբանի ձերբակալումը այսքան հետաքրքրություն առաջացրել Ադրբեջանում այն էլ «հրեական հովանավորներ ունեցող» Vesti.az-ում, պարզելը դժվար չէ: Բանն այն է, որ կրտսեր Փերինչեքը հեղինակն է «Հայկական հարցը եւ 120 փաստաթղթեր` ռուսական արխիվից» աշխատության, որտեղ «ապացուցվում է հայերի պահանջների կեղծ լինելը` հենց ռուսական արխիվային նյութերի վկայությամբ»: Փաստորեն` Փերինչեքը այն եզակի գիտնականն է, որը կարողացել է Հայոց ցեղասպանությունը միաձայն դատապարտած Ռուսաստանի արխիվի հիման վրա եզրակացություն կազմել, որ «Հայերի ցեղասպանություն չի եղել»: Ձերբակալման կապակցությամբ հայտարարությամբ է հանդես եկել Աշխատավորական կուսակցության ներկայացուցիչ Նուսրետ Սենեմը: Վերջինիս խոսքերում ուշագրավ են ձեւակերպումները, ըստ որոնց` «Փերինչեքը ձերբակալվեց, քանի որ կառավարության համար խոչընդոտ էր, որ ցանկանում է բարելավել հարաբերությունները Հայաստանի հետ»: Սենեմը նշում է. «Էրդողանի կառավարությունը դարձել է ԱՄՆ-ի ստրուկը, իսկ վերջինս սրանց օգտագործում է Մերձավոր Արեւելքում իրեն նպաստավոր իրավիճակի հասնելու համար: Էրդողանը պատրաստ է անել ամեն ինչ, որ ասում է Վաշինգտոնը: Սակայն ԱՄՆ-ի նպատակն է ի վերջո պառակտել եւ կործանել մեր երկիրը, իսկ դա մենք որեւէ մեկի երբեք թույլ չենք տա»:

«ԱԶԳ» ՕՐԱԹԵՐԹ #146, 23-08-2011