Հայաստանից մեկնած արշաւախումբը Դերսիմում եկեղեցի է յայտնաբերել` հայկական արձանագրութիւններով

Հայաստանից մեկնած արշաւախումբը յուլիսի 18-ից օգոստոսի 4-ը Արեւմտեան Հայաստանում (ժամանակակից Թուրքիայ) անցկացուած գիտական հետազօտութիւնների ընթացքում Դերսիմ քաղաքում եկեղեցի է յայտնաբերել` հայկական արձանագրութիւններով: Այդ մասին յայտնել է ազգագրագէտ Հրանոյշ Խառատեանը օգոստոսի 17-ին կայացած ասուլիսում:

«Թուրքագէտ Անոյշ Յովհաննիսեանի մասնակցութեամբ մենք մասնաւորապէս հետազօտել ենք Համշենի, Դերսիմի տարածքները, տեղական աւանդական երաժշտական գործիքները, երգերն ու պարերը, բանահիւսութեան բազմազանութիւնը. հեքիաթներ, ասացուածքներ, աղօթքներ եւ այլն», – ասել է Հ. Խառատեանը:

Բացի այդ, ասուլիսի մէկ այլ բանախօս, «Վան» ծրագրի գեղարուեստական ղեկավար Նորայր Քարտաշեանը նշել է, որ Հայրենադարձութեան եւ հիմնաւորման հասարակական կազմակերպութիւնների «Երկիր» միութեան կողմից կազմակերպուած «Վան» նախագծի շրջանակներում հայ երաժիշտները հանդէս են եկել Արգոււանի երաժշտական փառատօնում, Մնձուրի բնութեան եւ մշակոյթի փառատօնում` մասնակցելով Դերսիմի Օւաջըկ (յուլիսի 29) եւ Խոզաթ (յուլիսի 30) քաղաքներում կայացած համերգներին:

Քարտաշեանի խօսքով, հայ երաժիշտների ելոյթի ժամանակ տեղաբնիկներն ասել են. «Հայերի հեռացումով մեր տարածքից վերացաւ նաեւ մեր մշակոյթը» եւ նշել, որ իրենք իրենց հայ չեն համարում, սակայն հայ ժողովրդի հանդէպ որոշակի ջերմութիւն են զգում:

Իր հերթին, ասուլիսի երրորդ բանախօս, «Երկիր» նախագծի համակարգող Ռոբերտ Թաթոյեանը յայտնել է, որ սեպտեմբերին «Վանի» երաժիշտները Հրանտ Դինքի միջազգային հիմնադրամի հրաւէրով ելոյթ կ’ունենան Ստամբուլում: Այնուհետեւ Դիարբեքիրի քաղաքապետի հրաւէրով «Վանը» մասնակցելու է Դիարբեքիրում հակական եկեղեցու բացման արարողութեանը. եկեղեցին այժմ վերականգնւում է», — նշել է Ռ. Թաթոյեանը:

Նշենք, որ գիտարշաւն իրականացուել է Ֆրանսիայի Ռոն-Ալպ շրջանի իշխանութիւնների եւ «ֆինեկո» կազմակերպութեան ֆինանսական աջակցութեամբ, ինչպէս նաեւ թուրքական «Աանադոլու կուլտուր» հիմնադրամի կազմակերպչական օժանդակութեամբ:

NEWS.am