Աղթամարում սպասվող պատարագի նախապատրաստական աշխատանքներն սկսեցին ավելի արագ ընթանալ

Վանա լճի Աղթամար կղզու հետ միևնույն անունը կրող (եկեղեցու անունն իրականում Սուրբ Խաչ է-Ակունքի խմբ.) հայկական պատմական եկեղեցին նախապատրաստվում է երկրորդ պատարագին: Պոլսո հայոց պատրիարքի գլխավոր փոխանորդ, արքեպիսկոպոս Արամ Աթեշյանի` 4 օր առաջ կղզում կատարած շրջայցից հետո սկսել է ընդարձակվել այն կառամատույցը, որում կայանելու են պատարագին եկողներին կղզի հասցնող նավերը:

Առաջին անգամ անցյալ տարի` սեպտեմբերի 19-ին, Աղթամարի եկեղեցում կայացած պատարագը երկրորդ անգամ մատուցվելու է այս տարվա սեպտեմբերի 11-ին: Անցյալ տարվա համեմատ այս տարի ավելի մեծ մասնակցություն է սպասվում: Այդ պատճառով էլ նախապատրաստական աշխատանքները թափ են առել Վանի Գևաշ գավառում:

Առաջին փուլում կառուցվում են ուղևորներին կղզի հասցնող նավերի կայանատեղին հանդիսացող Աղթամարի կառամատույցը և վերին անցումը:

Աշխատանքներին տեղում ծանոթացած Գևաշի գավառապետ Յուսուֆ Գյունին ասաց. «Աղթամարի եկեղեցին մեծ ուշադրություն է վայելում` պատարագի կապակցությամբ: Առաջին փուլում կառամատույցն ենք ընդարձակելու և կանխելու այն խառնաշփոթը, որ կարող է առաջանալ պատարագի օրը: Այնուհետև ցամաքային ճանապարհների կողմով կառուցվող վերին անցումի շնորհիվ էլ հանգիստ կլինի այստեղի երթևեկությունը: Բացի այդ՝ կառուցում ենք նաև մի նոր ավտոկանգառ: Մեր բոլոր նախապատրաստական աշխատանքներն ավարտին ենք հասցնելու մինչև պատարագի օրը»:

Նշվեց նաև, որ անցյալ տարվա նման այս տարի ևս պատարագի մասնակիցները տեղեր են պատվիրել հյուրանոցներում, և որ հյուրանոցի աշխատողները նույնպես նախապատրաստություն են տեսնում:

11.08.2011

Սեյֆեթթին Իդիզը հաղորդում է Գևաշից (Վան)

Դողան լրատվական գործակալություն

http://www.hurriyet.com.tr/gundem/18465192.asp