Արևմտահայոց հարցերի ուսումնասիրության կենտրոնի նախաձեռնությամբ Դերսիմի Մնձուրի բնության և մշակույթի փառատոնին մասնակցած Մգրո Սարգսյանի անվան «Մարաթուկ» պարի և երգի ազգագրական համույթի անդամներից, Արևմտահայոց հարցերի ուսումնասիրության կենտրոնի աշխատակիցներից, բժիշկներից և մտավորականներից բաղկացած հայկական պատվիրակության ներկայացուցիչները Դերսիմի Օվաջըք քաղաքի կենտրոնի սրճարաններից մեկում հանդիպեցին Օվաջըքի քաղաքապետ Մուստաֆա Սարըգյուլի հետ: Մեր ընթերցողներին ենք ներկայացնում Մուստաֆա Սարըգյուլի տված հարցազրույցը Արևմտահայոց հարցերի ուսումնասիրության կենտրոնի տնօրեն Հայկազուն Ալվրցյանին:
Հայկազուն Ալվրցյան-Հարգելի’ Սարըգյուլ, այս օրերին տեղի է ունենում Մնձուրի բնության և մշակույթի փառատոնը: Օվաջըքում ինչպիսի՞ միջոցառումներ են կազմակերպվում փառատոնի շրջանակներում:
Մուստաֆա Սարըգյուլ–Ամեն տարի չորս օր տևող փառատոնը սկսվում է Թունջելիից (Դերսիմ) և առանձին-առանձին շարունակվում այստեղի գավառներում: Այն դեպքում, երբ փառատոնը մյուս գավառներում տևում է մեկական օր, մեր գավառում երկու օր է կազմակերպվում: Այս փառատոնի տարբերությունը մյուս ավանդական փառատոններից նրանում է, որ այն մի փոքր ավելի է նվիրված լինում բնությանը, շրջակա միջավայրին, թեկուզ և քիչ, սակայն կրում է նաև քաղաքական բնույթ: Հետևաբար, մենք էլ այստեղ ավելի շատ ենք թեթև քաղաքական բովանդակությամբ քննարկումներ անում, բնությանը և շրջակա միջավայրի թեմայով պանելներ կազմակերպում: Բացի այդ՝ երեկոյան նույն ձևաչափին համապատասխան, այսինքն` բնության, շրջակա միջավայրի և քաղաքական ձևաչափերին համապատասխան երկու օր համերգային միջոցառումներ են կազմակերպվում, որոնց մասնակցում է արվեստագետներից բաղկացած մի խումբ: Փառատոնի շրջանակներում օրվա ընթացքում կազմակերպվում են նաև այցեր շրջակա գյուղեր, և այն ավարտվում է այստեղ կայացած փոքրիկ միջոցառումներից հետո:
Հայկազուն Ալվրցյան-Ինչու՞ են բնության թեմայով և քաղաքական բնույթ ունեցող քննարկումները կազմակերպվում հատկապես Օվաջըքում:
Մուստաֆա Սարըգյուլ-Մնձուրի ազգային այգին սկսվում է Թունջելիից և ձգվում մինչև Օվաջըք: Այսինքն` ողջ ձորահովիտը գտնվում է այս տարածքում: Աղբյուրն էլ բխում է դարձյալ մեզ համար սուրբ արժեք եղող Մնձուրի ակնաղբյուրներից: Հետևաբար, թե’ բնության մեջ քիմիական նյութերով հանքերի որոնման և թե’ ջրի հանդեպ կիրառվող այս իմպերիալիստական քաղաքականության պատճառով անընդհատ աշխատանքներ են կատարվում հանուն ջրի, շրջակա միջավայրի և բնության պահպանման: Արդեն իսկ նման աշխատանքներ անելով` դառնում ենք ընդդիմություն, դա էլ իր հետ բերում է քաղաքականացվելու, քաղաքական ծրագիր իրագործելու հանգամանք: Մյուս կողմն էլ այն է, որ այս շրջանն առանց այդ էլ և’ աշխարհագրական ճնշումների տակ գտնվող մի տարածք է, և’, միևնույն ժամանակ, դավանանքի առումով հարում է ալևի-քըզըլբաշ հավատքին: Բացի այդ՝ սույն շրջանը լիովին ձախակողմյան դիրքորոշում ունեցող, լրիվ ձախ հարող անձանց շրջանն է:
Հայկազուն Ալվրցյան-Ի՞նչ թեմաներ են շոշափվում այս տարվա քննարկումներում:
Մուստաֆա Սարըգյուլ-Երեկ մի քննարկում է կայացել, որն ուղղված էր Դերսիմի սոցիալական ու քաղաքական հիմնախնդիրներին: Այսօր ևս քննարկում ենք նախատեսում: Այսօրվա քննարկումը գիտական ուսումնասիրություններ կատարած գիտնականների միջև է լինելու: «Ջրամբարները, ՀԷԿ-երը և բնության խանդը Մնձուրի հանդեպ» թեմայով այս քննարկումը տեղի է ունենալու այսօր՝ ժամը 17-ին: Քննարկմանը կմասնակցեն Ստամբուլի մի քանի համալսարաններից ժամանած պրոֆեսորներ, շրջակա միջավայրի մասնագետներ, ջրի պահպանմամբ զբաղվող քաղաքական խմբեր: Դա լինելու է ոչ թե խնդրի լուծմանը, այլ զուտ խնդրին ուղղված մի քննարկում, սակայն իհարկե կներկայացվեն նաև այլընտրանքներ:
Հայկազուն Ալվրցյան-Օվաջըքում հայեր կա՞ն արդյոք:
Մուստաֆա Սարըգյուլ-Կան: Որքանով որ տեղյակ եմ, Օվաջըքում 30-ից ավել հայկական ընտանիքներ են ապրում: Այստեղի հայերը հիմնականում զբաղվում են գյուղատնտեսությամբ և անասնապահությամբ: Կան նաև մանր արհեստով զբաղվող հայեր:
Հայկազուն Ալվրցյան-Շատ շնորհակալություն:
Մուստաֆա Սարըգյուլ-Մենք ենք շնորհակալ: Բարո~վ եք եկել Օվաջըք:
Հայկազուն Ալվրցյան-Բարո~վ տեսանք իրար:
30.08.2011
Օվաջըք-Դերսիմ
Leave a Reply