Հայկազուն Ալվրցյանի հարցազրույցը Մազկերտի (Մազգիրթ) քաղաքապետ Թեքին Թյուրքելի հետ

Դերսիմում հուլիսի 27-ից 31-ը կայացած Մնձուրի բնության և մշակույթի փառատոնի շրջանակներում Արևմտյան Հայաստան այցելած Արևմտահայոց հարցերի ուսումնասիրության կենտրոնի տնօրեն Հայկազուն Ալվրցյանը հարցազրույց է վերցրել Դերսիմ նահանգի Մազկերտի (Մազգիրթ) քաղաքապետ Թեքին Թյուրքելից: Ի դեպ, հենց Մազկերտի քաղաքապետի հրավերով է Մգրո Սարգսյանի անվան «Մարաթուկ» երգի-պարի ազգագրական համույթը մասնակցել Մնձուրի բնության և մշակույթի փառատոնին: Ստորև ներկայացնում ենք Թեքին Թյուրքելի հարցազրույցը Ակունքին:

Հայկազուն Ալվրցյան-Մենք շատ ուրախ ենք, որ այսօր մասնակցում ենք այս գեղեցիկ փառատոնին: Ու՞մ ուժերով է կազմակերպվել այն:

Թեքին Թյուրքել-Ձեզ մեզ հետ տեսնելը, ձեզ հետ համերաշխություն ստեղծելը բաղձանք է եղել ինձ համար: Այդ իմաստով պատվել եք մեզ ձեր գալստյամբ: Շնորհակալություն եմ հայտնում ձեզ` Մազկերտի ժողովրդի անունից: Այս փառատոնի ընդհանուր ծախսերը հիմնականում հոգացել են մեր ընկերները: Մեր քաղաքապետրանը չքավոր է, դրա համար էլ փառատոնի ծախսերն ինքներս ենք հոգում: Այսինքն` պետությունը որևէ ներդրում չի ունեցել փառատոնի կազմակերպման մեջ:

Հայկազուն Ալվրցյան-Շատ հետաքրքիր է, որ դուք ձեր սեփական միջոցներով այսպիսի փառատոն եք կազմակերպում: Երբ առավոտյան մենք եկանք ձեր քաղաք, լավ հյուրասիրություն վայելեցինք: Եվ շատ զարմացանք և ուրախացանք, որ այստեղ ձեզ հետ ապրում են նաև հայեր:

Թեքին Թյուրքել-Մենք հայերին երբեք մեզնից չենք օտարել: Հայ ժողովուրդը մեզ հետ կիսել է միևնույն ճակատագիրը: Անգամ առաջ անցնելով` այցելել եմ «Ակօս» շաբաթաթերթի խմբագրություն: Եթե այստեղ ձեզ պատկանող որևէ պատմական կամ մշակութային հուշարձանի վերականգնումը ձեռնարկվի, ե’ս դա կստանձնեմ` որպես քաղաքապետ: Ես նպատակադրվել եմ դա անել: Ինչպես հայտնի է, այստեղ կան (հայկական) եկեղեցիներ և այլ վայրեր… Ահա’, պատին նկարել եմ տվել Հրանտ Դինքի պատկերը: Անգամ շատ հեռուն գնալով` ցանկանում ենք քույր քաղաք դառնալ Հայաստանի որևէ քաղաքի հետ: Միջազգային չափանիշոներով ժողովուրդների այդ մերձեցումը մեզ կներկայացնի աշխարհին: Կարծում եմ, որ օգտակար կլինի, եթե դա անենք:

Հայկազուն Ալվրցյան-Ձեր առաջարկը շատ հետաքրքիր է և ուրախալի: Մենք կաջակցենք դրա կայացմանը` մեր ուժերի ներածին չափով: Իսկ ի՞նչ ծրագրեր եք ակնկալում իրագործել` քույր քաղաքներ հռչակելու միջոցով:

Թեքին Թյուրքել-Սա նախ և առաջ կմիավորի երկու ժողովուրդներին: Օրինակ` ձեր այստեղ գալն անգամ շատ մեծ ազդեցություն է թողել մեր ժողովրդի վրա, ի հայտ բերել մեր ընդհանրությունները: Դա երկու ժողովուրդների, երկու պետությունների միջև եղած թշնամության վերացումից բացի նաև կմերձեցնի մեր երկու ժողովուրդներին: Մենք հանդես կգանք փոխադարձ այցերով…

Հայկազուն Ալվրցյան-Այո’, այդ մշակութային փոխազդեցությունները մենք էլ զգացինք: Նկատեցինք, որ շատ ընդհանրություններ ունենք: Եվ դա մեզ շատ ուրախացրեց: Երևի մենք առաջին դեսպանները կլինենք այդ գործում:

Թեքին Թյուրքել-Այո’, լիովին համամիտ եմ:

Հայկազուն Ալվրցյան-Մենք կաշխատենք ամեն տարի ինչ-որ կերպ մասնակցել փառատոնին: Ուրախ կլինենք, եթե Դուք կարողանաք որևէ գործով կամ Ձեր ծրագիրն իրականացնելու համար գալ Հայաստան:  

Թեքին Թյուրքել-Մենք կարող է և որևէ ծրագրով Հայաստան այցելենք: Կարող եմ նաև գալ` զուտ ծանոթություններ հաստատելու նպատակով:

Հայկազուն Ալվրցյան-Մենք այդ հարցը մոռացության չենք մատնի: Մենք էլ այստեղ գալով` մեր մտքում որոշ ծրագրեր ենք ունեցել` կամուրջներ ստեղծելու առումով:

Թեքին Թյուրքել-Շնորհակալ եմ: Իմ շնորհակալությունն եմ հայտնում նաև Դերսիմահայերի միության նախագահ Միհրանին: Նա շատ մեծ դեր է խաղացել ձեր գալու հարցում, այսինքն` առիթ է ստեղծել ձեր այցի համար: Նա մեծ ջանքեր է գործադրում: Այս ընթացքում Ստամբուլ մեկնելով` զրույցներ եմ ունենեցել իր հետ: Միաժամանակ ուզում եմ նշել, որ իմ զոքանչը Վանի հայ քահանայի թոռն է:

Հայկազուն Ալվրցյան-Փաստորեն ազգականներ ենք:

Թեքին Թյուրքել-Այո’, ազգականներ ենք:

Հայկազուն Ալվրցյան-Շատ ուրախ ենք, հաջողություններ ենք մաղթում:

Թեքին Թյուրքել-Շնորհակալություն:

__________________________________

Լուսանկարում՝ Հայկազուն Ալվրցյանը, Մազկերտի (Մազգիրթ) քաղաքապետ Թեքին Թյուրքելը և Միհրան Փրկիչ Գյուլթեքինը 

 29.07.2011

Մազկերտ-Դերսիմ

www.akunq.net