Սոնա Փոլաթը մահացավ որպես տղամարդ, թաղվեց որպես կին

Հայտնի դարձավ, որ անցյալ տարի 79 տարեկան հասակում մահացել է Սոնա Փոլաթը, ով  Էրզրումում (Կարին) դեռևս երիտասարդ հասակում այրի էր դարձել ու տղամարդկանց հետապնդումներից ազատվելու համար մազերը կարճ կտրելով` տղամարդու հագուստ կրել:

Վեյիսէֆենդի թաղամասի Սերգենդեր փողոցում գտնվող երկհարկանի ավերակ տան ներքնահարկում բնակվող Սոնա Փոլաթը 28 տարեկան հասակում ամուսնու բռնությունների պատճառով այրիացել ու անզավակ  է մնացել, և ենթարկվել տղամարդկանց հետապնդումներին: Սոնա Փոլաթը հագել է տղամարդու հագուստ և  բնակություն հաստատել Կարսի Արփաչայ գավառի Թելեք գյուղում, որտեղ էլ կառապանությամբ երկար տարիներ վաստակել իր ապրուստը: 1931 թ. փետրվարի 10-ին ծնված Սոնա Փոլաթը մահացել է 2010 թ. ապրիլի 10-ին:  Սոնա Փոլաթը, ով կյանքի վերջին տարիներին գոյատևել էր Սոցիալական փոխօգնության և համերաշխության հիմնադրամից ստացած օգնությամբ, թաղվեց   Աբդուռահմանգազի գերեզմանոցում` որպես կին:

Հաթիջե Թաշդեմիրն, պատմելով երկար տարիներ իր հարևան Սոնա Փոլաթի մասին, հայտնեց, որ վերջին 11 տարվա ընթացքում ինքն է խնամել Սոնային: Թաշդեմիրն ասաց, որ նա տղամարդու հագուստ է կրել, որպեսզի տղամարդիկ չհետապնդեն և չանհանգստացնեն իրեն. «Այնուհետև ոչ մի կանացի հագուստ չի կրել: Հագնում էր ոչ միայն տղամարդու հագուստ, այլ նաև տղամարդու ներքնազգեստ: Մազերը կարճ էր կտրում, գլխարկ էր կրում: Երբեմն ես էի նրան սափրում: Երեխաները նրան և’ Սոնա տատիկ, և’ Սոնա պապիկ էին անվանում»:

Վեյիսէֆենդիի թաղապետ Արափ Փեքերն, ով Սոնա պապիկին ճանաչում է մանկուց, ասաց. «Սոնա Փոլաթին ճանաչում եմ մոտ 50 տարի: Մշտապես քայլում էր տղամարդու հագուստով: Կեպի էր կրում: Իր տեսակով էլ տղամարդու էր նման: Կառապան էր: Երկար տարիներ իր ապրուստը վաստակում էր կառապանությամբ: Ըստ էության, նրան գիտեին որպես էրզրումցի: Երբ իրեր կամ բեռ էր լինում փոխադրելու, նրան էին կանչում: Իր վաստակած գումարով էր հոգում ապրուստը: Հետապնդումներից խուսափելու համար որպես տղամարդ էր շրջում: Նրան շատ օգնեցինք: Նրա մտերիմները գիտեին, որ կին էր, սակայն ոչ մեկին չասացին այս մասին: Որպես կին` տղամարդու պես ապրեց ու մահացավ: Անցյալ տարի` ապրիլին, նրան հողին հանձնեցինք որպես կին»:

Թուրգայ Իփեք

Էրզրում /«Դողան» լրատվական գործակալություն

05.08.2011

http://www.hurriyet.com.tr/gundem/18423463.asp