Մարաթուկցիներն իրենց առաքելությունն անավարտ են համարում

“Մարաթուկ” երգի-պարի ազգագրական համույթը Հայաստան է վերադարձել Դերսիմից, որտեղ ընթանում էր Մնձուրու բնության եւ մշակույթի փառատոնը: Անպատմելի տպավորություններ եւ նորից վերադառնալու մեծ ցանկություն: Սրանք են փառատոնի մասնակիցների զգացողությունները:

Դերսիմում նորից լսվել է հայկական երգի ձայնը: “Մեզ այստեղ սպասում էին եւ որպես տանտերերի էին ընդունում”,- զարմացած ու ոգեւորված նշում են փառատոնի մասնակիցները: Որտեղ հայտնվում էին մարաթուկցիները` տարազով կամ ամենօրյա հագուստով, շատ արագ նրանց շուրջ հավաքվում էին մարդիկ ու համերգը սկսվում էր հենց փողոցում կամ մայթեզրին, ամենուր, որտեղ հայկական մշակույթին սպասող կար:

Մարաթուկցիները խոստովանում են` երբեք ոչ մի բեմի վրա այդպես չեն պարել: Հիշում են` առաջին համերգին Դերսիմի Նազմիյե գավառում, երբ ելույթն ավարտվեց “Յարխուշտայով”, պարողների ձեռքերը ցավում էին` այնպես ուժեղ էին հարվածել իրար:

Մելինե Անումյան աշխատում է Արեւմտահայաոց հարցերի ուսումնասիրության գիտահետազոտական կենտրոնում, որի նախաձեռնությամբ էլ “Մարաթուկը” մասնակցեց փառատոնին: Կենտրոնի կարեւոր նպատակն է` աշխարհին ներկայացնել Արեւմտյան Հայաստանի եւ արեւմտահայերի կյանքն այսօր: Երկու տարի շարունակ նա իր գործընկերների հետ akunq.net կայքում տեղեադրել է հայերեն եւ թուրքերեն լուրեր, հոդվածներ, լուսանկարներ արեւմտահայության, թաքնված հայության մասին։

Այս ուղեւորությունը հնարավորություն տվեց գրածն իրականում տեսնել։ Մելինեն հիշում է հիացմունք ու հուզմունք արտահայտող աչքերն ու իրար շատ նման պատմությունները, որ լսում էին թուրքերենով, թուրքի կամ քրդի ինքնությամբ ապրող հայերից:

“Պարողների հանդերձարան մտավ համշենահայ մի կին, որն այնպես էր լալիս, չափազանց հուզիչ էր: Նա ինքն էր տեղեկացել տեղական հեռուստաընկերություններից, որ նման հայկական խումբ է մասնակցում փառատոնին եւ անձամբ եկել էր ծանոթանալու”,- ասաց նա:

Փառատոնի փակմանը մասնակցում էր նաեւ աշխարհահռչակ երաժիշտ Միքայել Ասլանը: Երբ “Մարաթուկի” անդամ Արտաշես Խաչատրայնի հետ Ասլանը բեմ դուրս ելավ ու սկսեց երգել հայկական մեղեդին, հանդիսատեսի ոգեւորությունն աննկարագրելի էր:

Դերսիմի ուխտագնացները իրենց առաքելությունն անավարտ են համարում: Մարաթուկ լեռը դեռ չի զգացել իրենց պարի ուժը:

http://yerkirmedia.am/?act=search&w=%D5%84%D5%A1%D6%80%D5%A1%D5%A9%D5%B8%D6%82%D5%AF

Մնձուրու՝ բնության եւ մշակույթի փառատոնը Դերսիմում

«Երկիր Մեդիա»ի «Երկրի հարցը» ծրագրի 2011թ. օգոստոսի 5-ի հյուրերն են Հայկազուն Ակվրցյանը (Արեւմտահայության հարցերի ուսումնասիրության կենտրոնի տնօրեն) եւ Երվանդ Թորոսյանը (“Մարաթուկ” համույթի գեղարվեստական ղեկավար)։