Այց հայկական հինավուրց Տիգրանակերտ և Սուրբ Կիրակոս եկեղեցի

Տիգրանակերտ /Դիարբեքիր/ քաղաքի Սուր շրջանի քաղաքապետ Աբդուլլահ Դեմիրբաշն իր գրասենյակում ջերմ ընդունելության արժանացրեց Մնձուրի բնության և մշակույթի 11-րդ փառատոնի շրջանակներում Արևմտյան Հայաստան այցելած հայ ուխտավորներին: Քաղաքապետը հյուրերին դիմավորեց «Բարի գալուստ Տիգրանակերտ» խոսքերով:

Աբդուլլահ Դեմիրբաշը ներկաներին տեղեկություններ հաղորդեց «Բազմալեզու և բազմամշակութային քաղաքապետարան» նախագծի շրջանակներում կատարվող աշխատանքների մասին:

Սուրի քաղաքապետը, մասնավորապես խոսելով հայերի և քրդերի պատմական համատեղ անցյալի մասին, ասաց, որ իրենց պապերը Հայոց ցեղասպանության ժամանակ գործիք են եղել թուրքերի ձեռքում և մեջբերեց հայ քահանայի հայտնի խոսքերը` «Մենք նախաճաշն ենք, իսկ դուք` ճաշը»:

Հանդիպման վերջում քաղաքապետը, ներկայացնելով Թուրքիայի մեջ առաջին անգամ քաղաքապետարանի նախաձեռնությամբ հայերեն տպագրված Տիգրանակերտ քաղաքի ուղեցույցը, Հովհաննես Թումանյանի «Մի կաթիլ մեղրը», ծնունդով տիգրանակերտցի հայտնի արձակագիր Մկրտիչ Մարկոսյանի «Գյավուր թաղ» եռալեզու /հայերեն, թուրքերեն և քրդերեն/ հրատարակությունը, մեկական օրինակ նվիրեց նրանց:

Քաղաքապետի հետ հանդիպումից հետո խումբը շրջեց հայկական հինավուրց թաղամասերից մեկում` Գյավուրում, այցելեց մի շարք պատմամշակությաին վայրեր` այդ թվում նաև` Դիարբեքիր այցի հիմնական նպատակակետ Սուրբ Կիրակոս հայկական եկեղեցի: Ուխտավորների խումբը մոմ վառեց, կատարեց Հայր մերն ու Տեր ողորմեան դեռևս վերանորոգման մեջ գտնվող Սուրբ Կիրակոս եկեղեցում:

Ինչպես հանդիպման ժամանակ նշել էր քաղաքապետ Դեմիրբաշը, Միջին Արևելքի ամենամեծ եկեղեցին համարվող Սուրբ Կիրակոս հայկական եկեղեցու բացումը տեղի կունենա սույն թվականի հոկտեմբերի 31-ին:

akunq.net
Տիգրանակերտ