Էրդողանի հարձակմանը Սերժ Սարգսյանը պատասխանում է լռությամբ

Հայաստանն առայժմ պաշտոնապես անպատասխան է թողնում Թուրքիայի վարչապետի` երեկ արած խիստ հայտարարությունները եւ ներողություն խնդրելու պահանջը:

Ինչպես տեղեկացրել էինք, նախօրեին կայացած Էրդողան-Ալիեւ մամուլի ասուլիսում, պատասխանելով հարցերից մեկին, Էրդողանը բառացիորեն ասել էր հետեւյալը. “Ներկայում Լեռնային Ղարաբաղի տարածքը գրավված է, եւ գրավողները հայտնի են: Այդ մասին ասում ենք ոչ միայն մենք, այլեւ ՄԱԿ-ը: Դա ապացուցված է: Այդ հարցը պետք է լուծվի: Մինչեւ հիմա հայկական կողմը բացասական մոտեցում է ցուցաբերել այդ լուծման նկատմամբ: Ադրբեջանը միշտ ցուցաբերել է դրական մոտեցում։

“Հիմա դուք մեզանից ստացել եք Լենային Ղարաբաղը: Մենք կմեռնենք, իսկ դուք կգրավե՛ք Աղրին”: Միթե՞ դա տրամաբանություն է: Դա ի՞նչ հասկացություն է: Ինչպե՞ս կարելի է երիտասարդությանն այդպիսի ուղղություն տալ, նման հորիզոններ գծել: Ի՞նչ է դա նշանակում:

“Դե, երիտասարդություն, Հայաստանը սրանից հետո ցանկացած ձեւաչափով կարող է Թուրքիայի հետ պատերազմի մեջ մտնել”: Մենք մերժում ենք դա: Չի կարող լինել պետական նման գործիչ, այդպիսի դիվանագիտություն: Սարգսյանն այստեղ թույլ է տվել լուրջ սխալ: Ինքն էլ հաստատեց պատմական սխալը: Նա պետք է ներողություն խնդրի, ուղղի իր սխալը”:

Այնուհետեւ խոսքին միջամտել է Ալիեւը եւ զրույցը կատակի է վերածվել: Ալիեւի՝ “Ես շատ լավ տեղյակ եմ նրա մտածելակերպին” արտահայտությանը հետեկել է Էրդողանի պատասխանը.”Ես նրան այդքան ծանոթ չեմ, որքան դուք”։

Ալիեւը նաեւ նշել է.- “Նրանք կարծում են, որ լուծել են Լեռնային Ղարաբվաղի խնդիրը: Լեռնային Ղարաբաղն ադրբեջանական հող է եւ այժմ էլ մնում է ադրբեջանական: Կգա ժամանակ, երբ Ադրբեջանը կա՛մ խաղաղ ճանապարհով, կա՛մ պատերազմով կվերականգնի Ղարաբաղի նկատմամբ իր սուվերենությունը: Բայց հանդես գալ տարածքային հավակնություններով Թուրքիայի նման հզոր երկրի նկատմամբ…

Սա խոսում է այն մասին, որ այս մարդկանց գլխում ինչ-որ բան պակասում է: Նրանք իրական աշխարհում չեն ապրում, այլ իրենց իսկ ստեղծած երազների աշխարհում: Պետք է արթնանան քնից, վերադառնան իրական կյանք եւ առնվազն համեմատեն իրենց Թուրքիայի հետ”:

Ադրբեջանի նախագահը նաեւ հավելել է, որ Հայաստանը բազում հիմնախնդիրներ ունի, հերթական անգամ կրկնել արտագաղթի խնդիրը` շեշտելով, որ Ղարաբաղը միշտ մնալու է Ադրբեջանի մաս եւ այն կվերադարձնեն՝ խաղաղ կամ ռազմական ուղիով:

Սպասվում էր, որ այսօր Երեւանում կայանալիք մամուլի ասուլիսում Հայաստանի նախագահը կանդրադառնա Էրդողանի նման անթույլատրելի պահվածքին, սակայն այսօր Սերժ Սարգսյանը որեւէ բառ չի ասել դրա մասին՝ սահմանափակվելով Ալիեւին ուղղված հակիճ խոսքով:

“Չի կարելի սեփական ժողովրդին ամեն օր եւ ամեն մակարդակով թունավորել: Եվ դա նորմա՞լ մարդու հայտարարություն է, էլ չեմ ասում` երկրի ղեկավարի մասին: Ե՛վ ղարաբաղցիների, ե՛ւ հայ ժողովրդի պահանջը միակն է, որ խնդիրը պետք է լուծվի միջազգային իրավունքին համապատասխան, եւ այդ իրավունքի սկզբունքները շարադրված են “Մադրիդյան սկզբունքներ” կոչվող փաստաթղթում, որ կողմերին են առաջարկել Մինսկի խմբի համանախագահները` Միացյալ Նահանգները, Ֆրանսիան եւ Ռուսաստանը”,- ասել է ՀՀ նախագահը։

Սերժ Սարգսյանը կրկին հիշեցրել է, որ Հայաստանի պահանջները համահունչ են միջազգային հանրության պահանջներն:

http://yerkirmedia.am/?act=news&lan=hy&id=1868