Թուրքիայի վարչապետը Բաքվում հայտարարել է, թե Հայաստանի նախագահը պետք է ներողություն խնդրի

Թուրքակական լրատվամիջոցներն ու մի խումբ հայ վերլուծաբաններ օրեր առաջ կանխատեսում էին հայ-թուրքական հարաբերությունների ակտիվացման նոր փուլ։ Այսօր այդ կանխատեսումները փլվեցին: Հայ-թուրքական հարաբերություններում անկանխատեսելի կամ ընդհակառակը` կանխատեսելի շրջադարձ է տեղի ունեցել։

Թուրքիայի վարչապետ Ռ. Էրդողանը Բաքվում հայտարարել է, թե Հայաստանի նախագահը պետք է ներողություն խնդրի իր հայտարարության համար։ Էրդողանն այսօր Բաքվում, Ալիեւի հետ համատեղ մամուլի ասուլիսում, խիստ դատապարտել է Սերժ Սարգսյանի դիրքորոշումն՝ այն գնահատելով “պետական գործչին` առավել եւս նախագահին ոչ վայել պահվածք” եւ ասել` դրա համար անհարժեշտ է ներողություն խնդրել։

Հիշեցնենք, որ հուլիսի 23-ին Ծաղկաձորում, ի պատասխան Հայագիտական առարկաների համահայկական օլիմպիադայի մասնակիցներից մեկի հարցին, թե արդյո՞ք մեզ սպասվում է մի ապագա, որը մեզ վերադարձնելու է Արեւմտյան Հայաստանը` Արարատով հանդերձ, Սերժ Սարգսյանը հայտարարել է. “Այդ ամբողջը կախված է քեզնից եւ քո սերնդից: Իմ սերունդը, կարծում եմ, իր առջեւ դրած պարտականությունը կատարել է, երբ 1990-ական թվականների սկզբներին անհրաժեշտ էր մեր Հայրենիքի հատվածներից մեկը` Ղարաբաղը պաշտպանել թշնամիներից: Եթե դու եւ քո հասակակիցները ջանք ու եռանդ չխնայեք, եթե ձեզնից ավագներն ու ձեզնից կրտսերները ձեզ նման վարվեն, մենք ունենալու ենք աշխարհի լավագույն երկրներից մեկը”,- նշել էր Սերժ Սարգսյանը:

“Այն, ինչ արեց Սարգսյանը, ոչ այլ ինչ է, եթե ոչ՝ կրակել սեփական ոտքին”

Թուրքիայում ՀՀ նախագահ Սերժ Սարգսյանի ելույթի վերաբերյալ արդեն սկսել են արձագանքել անգամ կառավարական մակարդակով։

Խիստ խոսքով հանդես է եկել նաեւ այդ երկրի Եվրոպական Միության նախարար Էգեմեն Բաղըշը, որի “սա սեփական ոտքերին կրակել էր” արտահայտությունը մեջբերում են գրեթե բոլոր թուրքական թերթերը։

“Մենք տեսնում ենք, որ Թուրքիայի պարզած խաղաղության ձեռքը հասկանալ չկարողանալու չափ ապականված մտածողությամբ քաղաքական գործիչներ, նույնիսկ առաջնորդներ կան ոչ միայն Եվրոպայում, այլեւ նրա սահմաններից դուրս։ Հայ երիտասարդներին ատելություն սերմանող Սարգսյանի ելույթն իր իսկ երիտասարդությանը տանում է մութ մի ճանապարհով։ Այն, ինչ արեց Սարգսյանը, ոչ այլ ինչ է, եթե ոչ՝ կրակել սեփական ոտքին, անցնել իրեն թույլատրելիի սահմանը։ Հուսանք, որ հենց հայ երիտասարդությունը կտա նրա զառանցանքների արժանի պատասխանը”,- ասել է Բաղըշը։ Նա հավելել է, որ գիտի՝ Թուրքիայի հայ համայնքը եւ ծագումով հայ մեր քաղաքացիները մեծապես անհանգստացած են Սարգսյանի այդ սադրանքից։

“Հավատում եմ, որ նրանք հստակ դիրքորոշում կցուցաբերեն այդ սադրանքի նկատմամբ։ Իսկ եթե Սարգսյանը հետ չկանգնի այդ սխալից, ապա պետք է իմանա, այդ ամենն անպատասխան չի մնալու։ Թուրքիայի բարեկամությունն ուժեղ է, Թուրքիայի բոլոր բարեկամները շահել են մեր բարեկամությունից։ Սակայն հակառակը փնտրողները եւ Թուրքիայի նկատմամբ ատելություն տածողները միշտ էլ տուժել են”։

Թուրքերի բարձրացրած հիստերիան ոչ միայն շինծու է, այլեւ եզրակացությունների տեղիք պետք է տա

ՀՀ նախագահ Սերժ Սարգսյանի խոսքին հետեւած թուրքական արձագանքին այսօր անդրադարձել է ՀՀ ԱԳ նախարարի տեղակալ Շավարշ Քոչարյանը՝ պատասխանելով news.am գործակալության հարցին։

“Ինչպե՞ս կմեկնաբանեք Թուրքիայի վարչապետի եւ Թուրքիայի ԱԳՆ -ի քննադատությունը՝ ՀՀ Նախագահի` Ծաղկաձորում Համահայկական 5-րդ օլիմպիադայի մասնակիցների հետ հանդիպման ժամանակ սփյուռքահայ երիտասարդի կողմից հնչեցված հարցին տրված պատասխանի վերաբերյալ”:

“Գիտե՞ք` ինձ մոտ այնպիսի տպավորություն է, որ թուրքերն ուղղակի չեն կարդացել հարցի ամբողջական պատասխանը կամ պարզապես միահամուռ ասում են այն, ինչ ուզում են ասել` կառչելով խոսքի հատվածներից: Իրականում նման հարցին ՀՀ Նախագահի պատասխանը լուրջ, համակողմանի եւ շատ կշռադատված պատասխան է, որը եթե չեն ընկալում Թուրքիայում, ուրեմն պարզապես դա իրենց պետք չէ: Ամեն դեպքում բարձրացված հիստերիան ոչ միայն շինծու է, այլեւ եզրակացությունների տեղիք պետք է տա շատերին”,- ասել է Շ. Քոչարյանը:

Արեւմտյան Հայաստանը հայի համար երբեք չի դառնա Արեւելյան Անատոլիա վիդեո

Թուրքական հիստերիային՝ ՀՀ նախագահ Սերժ Սարգսյանի՝ Ծաղկաձորում արած հայտարարության վերաբերյալ, այսօր արձագանքել են Հայաստանի քաղաքական ուժերի ներկայացուցիչները եւ քաղաքագետները։

Մասնավորապես, բարձրացված աղմուկը մեկնաբանել են ՀՅԴ Հայ դատի եւ քաղաքական հարցերի գրասենյակի պատասխանատու Կիրո Մանոյանը, ՀՀԿ մամուլի խոսնակ Էդուարդ Շարմազանովը եւ քաղաքագետ Արտակ Շաքարյանը։

Մանրամասները՝ տեսանյութում

http://www.yerkirmedia.am/?act=news&lan=hy&id=1857