Թուրք-քրդական բախումների պատճառով Վանի փառատոնն ավարտվել է առանց եզրափակիչ համերգի

“Ակունք” ազգագրական համույթն օրերս վերադարձել է Թուրքիայից, որտեղ մասնակցել է Վանի մշակութային փառատոնին: Հրավերը Վանի քուրդ քաղաքապետինն էր:

Ազգային ժողովի պատգամավոր Արագած Ախոյանի աջակցությամբ, “Ակունքը” մասնակցել է փառատոնին, եւ ազգային տարազով, ազգային երգով ու պարով շրջել է Վանի փողոցներով, ելույթ է ունեցել Աղթամար կղզում, երգել Աղթամարի Սուրբ Խաչ եկեղեցում:

Հուլիսի 21-23-ը տարբեր երկրներից Վան էին ժամանել ստեղծագործական խմբեր` մասնակցելու Վանի մշակութային փառատոնին: Յուրաքանչյուր երկիր ներկայացնում էր իր մշակույթը:

“Գնացել էինք մասնակցելու փառատոնին ոչ թե որպես հյուրեր` այլ տանտիրոջ կարգավիճակով։ Մեր մշակույթը, որ ժամանակավոր բացակայել է այս միջավայրում, նորից հնչեցնենք”,- ասաց Ա. Ախոյանը։

2 տարի առաջ “Ակունքը” ելույթ է ունեցել Դերսիմի փառատոնում, որտեղ 40 հազարանոց հանդիսատեսի առջեւ ազգությամբ քուրդ երաժիշտ Միքայել Ասլանը նրանց ներկայացրել է որպես Ցեղասպանության զոհ դարձած ազգի զավակներ:

Այս տարի փառատոնի երկրորդ փուլն Աղթամարում էր: Համերգում ելույթ են ունեցել քրդական համույթն ու “Ակունքը”:

Փառատոնի ամփոփումն ու հիմնական համերգային ծրագիրը նախատեսվում էր Վանի հրապարակում: Համերգի նախանշված ժամից 5 րոպե անցել էր, բայց բեմի լույսերն անգամ չէին վառվում: Փոխարենը` հրապարակը լցվել էր թուրք զինվորականներով:

Ավելի ուշ պարզվել է, որ համերգի քուրդ կազմակերպիչները ձերբակալված են: Պատճառը` նախորդ օրերին փառատոնի ընթացքում քրդերի հնչեցրած քաղաքական վանկարկումներն էին, ազգային ու ազատագրական կոչերը: Մասնակիցներն ասել են` քրդերը միշտ օգտագործում են հնարավորությունն` իրենց քաղաքական խնդիրների մասին բարձրաձայնելու համար:

Թուրք-քրդական բախումների պատճառով Վանի մշակութային փառատոնն ավարտվել է առանց եզրափակիչ համերգի, բայց Հայաստանի պատվիրակությունն իր ուխտագնացությունն անավարտ չի համարում: Ավելին` այս անգամ Արեւմտյանից Արեւելյան Հայաստան են բերել Վանի քուրդ քաղաքապետի անկեղծ խոստովանությունը.
“Դուք էս երկրի տերերն եք, մենք ձեր տան պահակներն ենք։ Դուք եկել եք ձեր հողն ու ջուրը։ Մենք սրբությամբ պահում ենք ձեր մշակութային արժեքները մինչեւ դուք հետ կգաք”:

http://www.yerkirmedia.am/?act=news&lan=hy&id=1854