Պատերազմելու ենք Թուրքիայի դեմ` մեր հողերն ազատագրելու համար»

Թուրքական «Իհլաս» լրատվական գործակալության հաղորդմամբ` Նորվեգիայի մայրաքաղաք Օսլոյում և մոտակայքում գտնվող կղզում ուրբաթ օրը կեսօրից հետո 93 հոգու սպանած Անդերս Բեհրինգ Բրեյվիքն իր մանիֆեստում Թուրքիայի` ԵՄ-ին անդամակցելու ցանկությունը որակում է որպես աջակցություն ջիհադին (քրիստոնյաների դեմ մուսուլմանների կողմից մղվող սրբազան պատերազմ) և եվրոպական ազգի ոչնչացում:

Բրեյվիքը պաշտպանում է Հյուսիսային Կիպրոսի և Թուրքիայի Արևելյան ու Արևմտյան Անատոլիայի հատվածները դարձյալ քրիստոնեացնելու համար պատերազմ սկսելու անհրաժեշտությունը: Պարզվում է` Նորվեգիայի մարդասպանը Թուրքիա էլ է այցելել: Օսլոյում 93 հոգու սպանած Բրեյվիքի մանիֆեստը լի է Օսմանյան Կայսրության մասին հարյուրավոր հղումներով: Մանիֆեստում ներկայացվում է, թե քրիստոնեության արմատական հետևորդն ինչպես է ողջ մարդկության պատմությունը մեկնաբանում որպես առճակատում` մուսուլմանների և քրիստոնյաների միջև: 1518 էջանոց մանիֆեստից երևում է, որ սելջուկյան, օսմանյան և Թուրքիայի Հանրապետության թուրքերն ինչպես են սևեռուն գաղափարի վերածվել Բրեյվիքի համար: Ըստ իր օրագրի` Նորվեգիայի մարդասպանը Թուրքիա էլ է այցելել:

Օսմանյան պատմությունը կրոնական փոքրամասնությունների տեսանկյունից բզիկ-բզիկ արած Բրեյվիքը պաշտպանում է այն գաղափարը, թե Խաչակրաց արշավանքները պայմանավորված են եղել «պաշտպանական ոգով», և որ դրանք սկսվել են թուրքերի` քրիստոնյա աշխարհը նվաճելու դեմ… Բրեյվիքը, երկար-բարակ հիշատակություններով պատմելով, թե թուրքերը պատմության ընթացքում սպանել են միլիոնավոր քրիստոնյաների, հարյուրհազարավորների էլ` իսլամացրել դևշիրմեի (մանկահավաք) համակարգի միջոցով, թուրքերին բնութագրում է որպես աշխարհի «ամենացեղասպան ազգերից» մեկը: Նորվեգիայի մարդասպանի կարծիքով` թուրքական ազգը «ցեղասպանություն» է իրագործել հայերի, հույների և ասորիների հանդեպ: Թանզիմաթը, Բարենորոգումների հրովարտակը (Islahat Fermanı), Աբդուլ Համիդ Երկրորդին, Միություն և առաջադիմություն կուսակցության դարաշրջանի հետ մեկտեղ Էնվերին, Թալեաթին ու Ջեմալին երկար-բարակ վերլուծության ենթարկած Բրեյվիքը մանրամասն անդրադառնում է նաև Աթաթուրքին: 147-րդ էջից մինչև 187 էջը Օսմանյան Կայսրությունը վերլուծելուց հետո հետևյալ կերպ է ավարտում այդ բաժինը. «Էրդողանի` Թուրքիան վերստին իսլամացնելուն ուղղված ջանքերն առաջնորդվելու են շարիաթով, և ջիհադի միջոցով Եվրոպայի հենց սրտում հիմնվելիք թուրքական երկիրը լրիվ համընկնելու է օսմանյան անցյալի հետ: Թե’ Էրդողանը և թե’ 10 տարի առաջ վարչապետ եղած իսլամիստ Էրբաքանը մատնանշում են 1950-60-ականներից մինչ օրս շարունակվող Թուրքիայի իսլամական սոցիալ-քաղաքական զարթոնքի առաջիկա փուլը: Մենդերեսի կառավարությունը հանուն քվեների խաղացել է մուսուլմանների կրոնական զգացմունքների հետ, դարձյալ թույլ է տվել տարիկատների (դերվիշների միաբանություն) գործունեությանը, ինչպես նաև` արագացրել մզկիթների կառուցումը: Թուրքիայի` ԵՄ անդամակցությունը պետք է մերժվի»:

Թուրքիայի հանդեպ պետք է գործադրենք Սևրի դաշնագիրը

Բրեյվիքը, 235-րդ էջից սկսած, քրիստոնեության հեռանկարով դիտարկում է Վիեննայի երկրորդ պաշարումը, այնուհետև նորից մեղադրում թուրքերին` Բոսնիան ու Կոսովոն իսլամացնելու մեջ: 313-րդ էջից սկսած բացահայտում է, որ մեծ ԵՄ-ն թշնամի է ՄԱԿ-ին և ԵԱՀԿ-ին: Նա պաշտպանում է հնարավորինս շուտ ԵՄ-ն ոչնչացնելու գաղափարը: 723-րդ էջից սկսած Աթաթուրքի վերաբերյալ մեկնաբանություններ անող Բրեյվիքը պնդում է, թե «աթաթուրքյան մոտեցումն» անհաջողության է մատնվել, երկիրը 1923 թ. հետո աշխարհիկացվել է բանակի ուժի միջոցով, սակայն 70-80 տարի անց «շարիաթը» վերադարձել է: Բրեյվիքը, պաշտպանելով այն տեսակետը, թե Եվրոպայի ճակատագիրը կախված է Թուրքիայի` ԵՄ անդամ լինել-չլինելուց, մատնանշում է նաև այն, որ Թուրքիան անդամ լինելու դեպքում դառնալու է եվրոպական ընտանիքի ամենամեծ երկիրը:

Բրեյվիքը, Թուրքիայի անդամակցությանն աջակցող ԵՄ պաշտոնյաներին և խորհրդարանականներին խորհուրդ տալով խաչ կրող շապիկով գնալ Թուրքիայի գավառական շրջանները, պնդում է, թե այդ մարդիկ կամ ծեծի կենթարկվեն, կամ էլ կսպանվեն, և այդպիսով կերևա, թե որքանով են հանդուրժողական մուսուլման թուրքերը: Նորվեգիայի մարդասպանը, Թուրքիայի ԵՄ անդամակցության օգտին հանդես գալը որակելով որպես աջակցություն «ջիհադին» և եվրոպական ժողովրդի վերացում, հանդես է գալիս հետևյալ հռետորական հարցով. «Ինչու՞ հարաբերություններ կառուցենք մեզ ոչնչացնել ցանկացող մի երկրի հետ»: Նա մի նոր համաշխարհային անվտանգության կազմակերպության ստեղծման, բոլոր քրիստոնեական, բուդդիստական և հնդկական երկրների միաբանման անհրաժեշտությունը շեշտելուց հետո ասում է. «ՆԱՏՕ-ն կարող է գոյությունը պահպանել միայն այն դեպքում, եթե ԱՄՆ-ն համաձայնվի ՆԱՏՕ-ից վռնդել Թուրքիային և Ալբանիային»:

Իսկ «Եվրոպայի տարածքային պահանջները» ենթավերնագրի ներքո նշում է, թե Հյուսիսային Կիպրոսի Թուրքական Հանրապետություն անվան տակ հայտնի հողերը պետք է տրվեն հույներին, Արևմտյան Անատոլիա հորջորջված տարածքները` Հունաստանին, Արևելյան Անատոլիա կոչեցյալ հողերը` Հայաստանին, իսկ նշյալ տարածքներում բնակվող բոլոր թուրքերը պետք է տեղահանվեն, և վկայակոչում է Սևրի պայմանագիրը: Բրեյվիքը, խոսելով Հյուսիսային Կիպրոսը և Թուրքիայի Արևելյան ու Արևմտյան Անատոլիայի հատվածները վերստին քրիստոնեացնելու համար պատերազմ սկսելու անհրաժեշտության մասին, պնդում է նաև, թե ռազմական գործողությունները պետք է սկսել` նախ Պակիստանի միջուկային զենքը ոչնչացնելով, հակառակ դեպքում պակիստանցիներն այդ տեխնոլոգիան կտան թուրքերին:

25.07.2011

Իհլաս լրատվական գործակալություն

http://www.ihlassondakika.com/haber_Topraklarimizi-kurtarmak-icin-Turkiye-ile-savasmaliyiz_393619.html