Վանի փառատոնն սկսվեց խաղաղության բարեմաղթանքով

Վանա լճի Մշակույթի, արվեստի և բնության փառատոնը մեկնարկեց երեկ երեկոյան` «Մշակույթի և արվեստի միջոցով դեպի ազատ ապրելակերպ» կարգախոսով: Երկրում պատերազմի և Լինչի դատաստանի վայնասուններին ընդդեմ երգ ու պարով, Վանի յոթհազարամյա պատմությանը սազական բազմազանությամբ լեցուն մշակութային միջոցառումներով խաղաղության և եղբայրության ուղերձ հղել պատրաստվող վանեցիներին միացան նաև հայաստանցի, իրաքցի, իրանցի և սիրիացի մասնակիցները: Բազմաթիվ հարևան երկրներից և Թուրքիայի տարբեր նահանգներից փառատոնը դիտելու նպատակով Վան ժամանած հյուրերի ներկայությամբ աշխուժացած քաղաքի ոչ մի հյուրանոցում տեղ չէր մնացել:

Փառատոնի բացումը կատարվեց պատմական Տուշպա (Վան) ամրոցի փեշերին: Բացման արարողությանը, որին մասնակցեցին հարյուրավոր մարդիկ, իրենց ներկայությամբ պատվեցին նաև ԹԱՄԺ-ում Աշխատանքի, ժողովրդավարության և ազատության խմբակցության պատգամավորները, որոնց մեջ էին Սեբահաթ Թունջելը, Հասիփ Քափլանը, Սըրրը Սաքըքը, Եվրոպայի նախկին խորհրդականներ Ֆելեքնազ Ուջան, Խաղաղության մեջլիսի անդամ Սեյդի Ֆըրաթը, քաղաքապետեր և բազմաթիվ վանեցիներ:

Խաղաղության մեր հույսը թող դարձյալ չմնա մյուս տարվա

Բացման արարողության ժամանակ ելույթ ունեցած Վանի քաղաքապետ Բեքիր Քայան ասաց, թե ամեն տարի խաղաղության հույսերը մնում են հաջորդ տարվան: Քայան նաև նշեց. «Անցյալ տարի էլ էինք այստեղ արտահայտել խաղաղության մասին մեր հույսերը, սակայն այդ օրվա առավոտը դիմավորել էինք թաղումներով ու մահվան դեպքերով: Այսօր նույնպես, երկու օր առաջ, այս քաղաքում թաղում կատարվեց, բայց և այնպես շարունակելու ենք արտահայտել մեր ժողովրդի խաղաղության հույսերն»:

Քայան նաև շեշտեց, որ Վանն իր մշակույթով, աշխարհագրությամբ և արվեստով Միջին Արևելքի ամենահինավուրց քաղաքներից մեկն է: Քայան հայտնելով, թե Վանի ամրոցները, եկեղեցիները, մզկիթները, լիճը, կղզիները, աշխարհագրությունը, լեզուները, կենսակերպերը և բանահյուսությունը իսկական մի խճանկար են կազմում, ասաց. «Բոլորիդ հրավիրում եմ` հիանալ այս հինավուրց քաղաքի ամրոցով, լճի լազուրով, Աղթամարի թագավոր Մենուայի` (Մենուան իրականում Ուրարտուի թագավորներից է-Ակունքի խմբ.) միշտ դեպի խաղաղությունը հոսած ջրանցքով, եկեղեցու զանգի, ազանի (մուսուլմաններին ուղղված աղոթքի հրավեր), քյամանչայի, եղեգնափողի ձայներով և արևի հոյակապ մայրամուտով»:

Փառատոնի բացման արարողությունն ավարտվեց որպես քրդերի առաջին օպերային երգիչ հայտնի սիրիացի Միզգին Թահիրի կատարումներով ու շուրջպարերով:

http://www.evrensel.net/news.php?id=10337