«Երազանքս է Անիի ավերակներում հայկական ժողովրդական երգ երգելը»

Թուրքիայում հայերենով թողարկված առաջին ալբոմի հեղինակ Սիպիլ Փեքթորոսօղլուն հայտնեց. «Ուզում եմ անել իմ ուժերի սահմաններում ամեն բան, որպեսզի այս հողերին պատկանող հայերենը չանհետանա»:

Կառավարության` էթնիկ ինքնություններին ուղղված նախաձեռնությունների արդյունքում սկսել են հեռուստահաղորդումներ ցուցադրվել քրդերենով և արաբերենով, իսկ Թուրքիայի պետական ռադիոյով` տասնյակ տարբեր լեզուներով, այդ թվում` հայերենով ու ադրբեջաներենով ռադիոհաղորդումներ հեռարձակվել:

Թուրքիայի պետական հեռուստառադիոընկերությունը (TRT), որոշ ժամանակ առաջ մի նախաձեռնությամբ ևս հանդես գալով, պատմության մեջ առաջին անգամ հայերենով տեսահոլովակ թողարկեց: Այդ տեսահոլովակի գեղեցիկ ձայնը պատկանում էր Սիպիլ Փեքթորոսօղլու անունով մի հայ երգչուհու: Թուրքիայի` հայերենով առաջին ալբոմի հեղինակ երիտասարդ երգչուհին նշեց. «Բնականաբար պետական հեռուստատեսությամբ իմ առաջին տեսահոլովակը տեսնելն անասելի երջանկություն պարգևեց ինձ: Ես ուզում եմ անել հնարավորը, որպեսզի այս հողերին պատկանող հայերենը չվերանա»:

Մինչ օրս բազմաթիվ հայտնի երգիչների, այդ թվում` Սեզեն Աքսուի, Նյուքհեթ Դուրուի և Մերջան Դեդեի հետ համերգներ տված Փեքթորոսօղլուն ասաց. «Երազանքս է Անիի ավերակների առաջ հարյուրամյա հնություն ունեցող մի հայկական ժողովրդական երգ երգելը: Անին գերբնական վայր է: Մի պահ, երբ օրակարգ բերվեց սահմանի բացման հարցը, մտածեցինք գնալ Կարս, սակայն չստացվեց: Ալբոմումս ընդգրկված է «Տեսնեմ Անին ու նոր մեռնեմ» հին երգը: Ես կարող եմ հենց այդ երգը երգել Անիում»:

Հայերը զարմանում են

Երիտասարդ երգչուհին հետևյալը պատմեց տեսահոլովակի թողարկման հանդեպ հետաքրքրության մասին. «Երբ Թուրքիայի պետական հեռուստառադիոընկերությանը (TRT) ուղարկեցի համացանցի տեսահոլովակս, ընկերությունն անմիջապես այն ցուցադրելու որոշում կայացրեց: Շատ ուրախացա: Համացանցով դիտելն այլ բան է, իսկ հեռուստատեսությամբ` լրիվ ուրիշ: Շատ գեղեցիկ արձագանքներ ստացա»: Փեքթորոսօղլուն նաև նշեց. «Հայերի համար էլ դա նորույթ եղավ, քանզի նախկինում հայերենով ալբոմները ԱՄՆ-ից ու Հայաստանից էինք բերում: Հիմա այստեղից ենք այնտեղ ուղարկում: Դա շատ մեծ հպարտություն է: Հայերը շատ են զարմանում, որ ես նման ալբոմ եմ թողարկել, որովհետև չէին պատկերացնում, որ մի որևէ հայ կարող է նոր երգերով հանդես գալ, այն էլ` Ստամբուլից լինելով: Առաջինը լինելը հրաշալի բան է»:

Ստամբուլում ծնված և հայկական համայնքի անդամների մեծ մասի նման Քուրթուլուշ թաղամասում բնակվող Սիպիլ Փեքթորոսօղլուի հոր ընտանիքն էլ է Պոլիսից: Մորական կողմից պապը Սվասի (Սեբաստիա) Դիվրիղի (Տևրիկ) գավառակից է, իսկ մայրը` Թոքաթի Էրբաա գավառից:

Բիլգե Էսե

http://www.sabah.com.tr/Yasam/2011/07/18/hayalim-ani-harabelerinde-ermeni-turkusu-soylemek