Եկեղեցիները պետք է վերանորոգվեն

Ուզում են եկեղեցիներում և գերեզմանոցներում վերականգնողական աշխատանքներ կատարել:

1915 թ. ի վեր չվերանորոգված եկեղեցիների և գերեզմանոցների վերականգնման նպատակով վերանորոգման արտոնագիր ստանալու համար Մշակույթի և զբոսաշրջության, ինչպես նաև` Ֆինանսների նախարարություններին դիմած Սասունի գյուղերի հայերի սոցիալական փոխօգնության և մշակութային համերաշխության միության նախագահ Ազիզ Դաղջըն հայտնեց, որ իրենք ցանկանում են նախ վերանորոգել Սասունի Մարութա լեռան փեշերին գտնվող եկեղեցիները:

«Մենք ուզում ենք վերանորոգել մեր եկեղեցիներն ու գերեզմանոցները»

Բիթլիսի, Բաթմանի, Մուշի, Վանի, Ստամբուլի և մյուս բոլոր նահանգների, գավառների և գյուղերի հայերի և Սասուն գավառի ու գյուղերի հայերի սոցիալական փոխօգնության և մշակութային համերաշխության միության ղեկավար խորհրդի նախագահ Ազիզ Դաղջըն դիմել է Մշակույթի և զբոսաշրջության, ինչպես նաև` Ֆինանսների նախարարություններ: Միության նախագահ Ազիզ Դաղջըն, հիշեցնելով Լոզանի պայմանագրի 42-րդ հոդվածի 3-րդ պարբերության մեջ ամրագրված «Փոքրամասնություններին պատկանող եկեղեցիները, սինագոգները, գերեզմանոցները և այլ կրոնական հաստատությունները պետք է պահպանվեն» արտահայտության վրա հիմնված Սահմանադրական դատարանի որոշման մասին, ընդգծեց. «Լոզանի պայմանագրի այդ որոշման կիրառմամբ, որպես հայ փոքրամասնություն, թույլտվություն ենք պահանջում` մեր եկեղեցիներն ու գերեզմանոցները վերանորոգելու և վերականգնելու համար, որովհետև 1915 թ. ի վեր մեր եկեղեցիներն ու գերեզմանները չեն նորոգվել»: Նախագահ Դաղջըն նշելով, թե վորանորոգման ու վերականգնման համար խնդրագիր է հղել նաև Թուրքիայի վարչապետ Ռեջեփ Թայիփ Էրդողանին, ասաց. «Միակ բանը, որ խնդրում ենք կառավարությունից, արտոնագրի տրամադրումն է` վերականգման կարիք ունեցող մեր պաշտամունքի պատմական վայրերի վերանորոգման համար»:

Մեր վանքերը սպասում են վերանորոգման

Միության նախագահ Դաղջըն հայտնեց. «Սասուն գավառում նորոգման կարոտ եկեղեցիներ ու վանքեր ունենք: Անուշադրության մատնված լինելու հետևանքով մեր որոշ եկեղեցիներ վերածվել են ախոռի: Ցանկանում ենք վերանորոգել Սասունի Մեշելի Թուրնալը արտում գտնվող Սուրբ Առաքելոց հայկական վանք-եկեղեցին: Ուզում ենք նաև, որ Մշակույթի և զբոսաշրջության, ինչպես նաև` Ֆինանսների նախարարությունների կողմից մեզ արտանագիր շնորհվի` Մարութա լեռան 2973 մ բարձրությամբ գագաթին գտնվող և հայկական փոքրամասնության համայնքին պատկանող Սուրբ Աստվածածին եկեղեցին, ինչպես նաև` Սանասար ու Բաղդասար եղբայրների դամբարաններն ու գերեզմանները նորոգելու համար: Մեր այդ նշանավոր սուրբ վայրերը տարիներ շարունակ թողնվել են ճակատագրի քմահաճույքին: Եթե դրանք վերանորոգենք, այս շրջանը թե’ կվերածվի զբոսաշրջության դրախտի և թե’ կբացվի կրոնական արարողությունների համար: Մենք նաև անհրաժեշտ գումար կապահովենք` եկեղեցու շրջակայքում գտնվող գերեզմանները նորոգելու համար»:

http://www.batmancagdas.com/kiliseler-onarilmali.htm