Թուրքիայի քրդական «Խաղաղություն եւ ժողովրդավարություն» (BDP) կուսակցության Վանից ընտրված կին պատգամավոր Այսել Թուղլուքը հայտարարել է, թե որպես քուրդ ժողովուրդ, իրենք Թուրքիայի ամբողջականության սահմաններում ժողովրդավարական ինքնավարություն են հռչակում։
Թուրքական Milliyet-ի փոխանցմամբ՝ հուլիսի 14-ին «Խաղաղություն եւ ժողովրդավարություն» կուսակցության Դիարբեքիրի նահանգային գրասենյակում «Ժողովրդավարական հասարակությունների կոնգրես»-ի (DTK) 6 ժամ տեւած արտակարգ համաժողովից հետո քուրդ կին պատգամավոր Այսել Թուղլուքը հայտարարությամբ է հանդես եկել։ Թուղլուքը նշել է, թե իրենք չեն ընդունում թուրքական իշխանությունների կողմից քուրդ ժողովրդին մերժելու քաղաքականությունը եւ ցանկանում հասնել նոր կարգավիճակի։
Թուղլուքի խոսքով՝ ներշնչվելով պատմական իրադարձություններից, հիմնվելով մարդու իրավունքների միջազգային կոնվենցիաների եւ համատեղ հայրենիքի հասկացության վրա, քուրդ ժողովուրդը Թուրքիայի ամբողջականության շրջանակներում ժողովրդավարական ինքնավարություն է հայտարարում։ Նա նաեւ կոչ է արել միջազգային հանրությանը՝ ճանաչել քուրդ ժողովրդի հայտարարած ժողովրդավարական ինքնավարությունը, որը կարող է մոդել ծառայել Թուրքիայում ապրող մյուս ժողովուրդների համար։
15.07.2011
Leave a Reply