«Աքչամը մեզ թիրախ է դարձրել հայերի համար. մեր կյանքը վտանգի տակ է»

Հայոց ցեղասպանության մասին թեզերի առաջին պաշտպան պատմաբան Թաներ Աքչամը ԱՄՆ-ում բնակվող որոշ գիտնականների մեղադրել է «Թուրքիայի արտաքին գործերի նախարարությունից կաշառք ստանալու մեջ»: Մեղադրված 5 հոգու անունից «Վաթան» օրաթերթին հարցազրույց տված դոկտոր Հաքան Յավուզը նշեց. «Մենք մեր աշխատավարձն ստանում ենք համալսարանից: Իրականում հայտնի է, թե նա (Աքչամը) ումից է փող ստանում: Նա մեզ թիրախ է դարձրել դաշնակցական-հնչակյան ավազակխմբերի համար. դիմում ենք դատարան»:

ԱՄՆ-ում հրապարակված մի գիրք կատաղի վիճաբանություն է հարուցել հայկական թեզերը պաշտպանող թուրք պատմաբան Թաներ Աքչամի և Ցեղասպանության պնդումներն անհիմն համարող մասնագետների միջև: Արիզոնա նահանգում գտնվող Գլենդելի ժողովրդական գրադարանում 3 հայ պատմաբանի մասնակցությամբ կայացած խորհրդաժողովում Աքչամը, ելույթ ունենալով, ջախջախել է ամերիկացի պատմաբան Մայքլ Գյունտերի գրչին պատկանող «Հայոց պատմությունը և Ցեղասպանության հարցը» գիրքը: Աքչամն առաջ է քաշել այն տեսակետը, ըստ որի` Գյունտերը գումար է ստացել Թուրքիայի արտգործնախարարությունից: Բացի այդ` Աքչամը կասկածի ստվեր է գցել նաև նշյալ գրքին աջակցած Մասաչուսեթսի համալսարանի նշանավոր պատմաբան Գվենտեր Լևիի, Virginia Marine Corps Command & Staff քոլեջում դասավանդող օսմանյան պատմության մասնագետ Էդվարդ Էրիկսոնի, Յուտայի համալսարանի Միջազգային հարաբերությունների ամբիոնի դասախոս, դոկտոր Հաքան Յավուզի և Բիլքենթի համալսարանում աշխատող ամերիկացի քաղաքագետ Ջերեմի Սալթի վրա: «Վաթան» օրաթերթը դեպքերի այդ զարգացումից հետո դիմել է այն գիտնականներին, որոնց անունները տվել էր Աքչամը: Աքչամի ելույթից հետո տեսակետներ փոխանակած այդ բոլոր գիտնականների անունից «Վաթան»-ին հարցազրույց է տվել Հաքան Յավուզը.

«Թաներ Աքչամը շատ անհանգստացավ այդ վերջին գրքի հրատարակումից հետո, քանզի սույն գիրքը հերքում է Աքչամի պաշտպանած թեզերը, աղավաղում նրա արած անգիրը, փաստաթղթերով ցույց տալիս, թե ինչպես է Աքչամն աղճատել հայկական պնդումներին վերաբերող աղբյուրները:

Մենք որոշել ենք իրավական պայքար մղել Աքչամի դեմ: Պայմանավորվել ենք նաև մինչ այդ Լյուիին ուղղված մեղադրանքների պատճառով հայկական սփյուռքից փոխհատուցում ստանալու գործը շահած դատապաշտպանի հետ»:

«Նա արդարացնում է իր ստացած աշխատավարձը»

«Մենք մեր աշխատավարձն ստանում ենք ԱՄՆ-ում գտնվող համալսարաններից: Որևէ առնչություն չունենք Թուրքիայի արտաքին գործերի նախարարության հետ: Այնինչ` հայտնի է, թե որտեղից է իր աշխատավարձն ստանում Աքչամը: ԱՄՆ-ում ռադիկալ հայերի հիմնած ամբիոնից է գումար ստանում: Եթե խոսքը գնում է գիտական անաչառության մասին, ապա պետք է քննարկման առարկա դառնա ոչ թե մեր, այլ նրա անկողմնապահությունը: Նա պետք է իրե’ն հարցաքննի:

Աքչամը մեզ թիրախ է դարձնում ԱՄՆ-ի դաշնակցական-հնչակյան խմբի համար: Նա ոչ գիտական մթնոլորտում արած իր ելույթով մեզ թիրախ է դարձրել: Մեր կյանքը վտանգի տակ է: Այստեղ ավելանում են ԱՍԱԼԼԱ-ին նմանվող կառույցների թիվը: Սփյուռքահայերը, քանի որ չեն կարողանում հասնել իրենց ուզածին, ավելի արմատական են դարձել: Ես բնակվում եմ հայերի կողմից հոծ բնակեցված Կալիֆորնիա նահանգին մոտ մի շրջանում և նմանատիպ մեղադրանքների պատճառով անհանգստանում կյանքիս անվտանգության համար:

Աքչամն աշխատասեր անձնավորություն է, բայց` անչափ ոխակալ: Նա ատելություն ու քինախնդրություն ունի թուրք հասարակության և Թուրքիայի պատմության հանդեպ` Թուրքիայում իր ունեցած փորձի և բանտարկության պատճառով: Նրա քինապահության հարցում ազդեցություն է թողել նաև այն, որ նա լքվել է իր կնոջ կողմից:

Աքչամն այն մարդկանցից է, ովքեր ջանում են արդարացնել իրենց ստացած աշխատավարձը: Նա ֆինանսավորվում է հայկական սփյուռքի արմատականների կողմից: Ամերիկայում չկա մեկը, որ նրա չափ խանդավառ կերպով պաշտպանի Ցեղասպանության մասին թեզերը»:

Հարցազրույցը վարել է Ուղուր Քոչբաշը

Վաթան օրաթերթ

13.07.2011