Դեպի Մարութա լեռ լեռնագնացությունը կատարվելու է հուլիսի 30-ին

Հայտնի դարձավ անհամբերությամբ սպասված լեռնագնացության ամսաթիվը դեպի Սասունի Մարութա լեռ:

Հատյնի դարձավ անհամբերությամբ սպասված լեռնագնացության ամսաթիվը դեպի Սասունի Մարութա լեռ: Սասունի գավառապետ Յուսուֆ Իզզեթ Քարամանի նախագահությամբ նիստ գումարած հանձնաժողովը հայտնեց, որ լեռնագնացությունը սպասվում է հուլիսի 30-ին` շաբաթ օրը:

Այս տարի լեռնագնացությանը մեծ մասնակցություն է լինելու: Գավառապետ Յուսուֆ Իզզեթ Քարամանի, քաղաքապետ Մուզզաֆեր Արսլանի, անվտանգության պետ Սահիր Ուզունի, գավառի ժանդարմերիայի հրամանատար, հարյուրապետ Թոլգա Բաշի, նահանգային հանձնախմբի, քաղաքացիական-հասարակական կազմակերպությունների և գյուղապետերի մասնակցությամբ կայացած նիստում քննարկվեց լեռնագնացության ծրագիրը: Նիստին ելույթ ունեցած գավառապետ Յուսուֆ Իզզեթ Քարամանը նշեց. «Այս նիստը գումարել ենք, որպեսզի լեռնագնացությունը դեպի Մարութա լեռ, որին մասնակցելու են լինելու թե’ դրսից և թե’ Սասունից, ավելի կազմակերպված իրականացնենք: Մեր նպատակն է նախապես ծրագրվածը գործնականորեն ի կատար ածել»:

Մոտ 2 ժամ տևած նիստում ընդունված որոշումների համաձայն` մագլցումն սկսվելու է վաղ առավոտվա ժամերին Սասունի Ջումհուրիյեթ հրապարակից, իսկ Մարութա լեռան գագաթին նախաճաշ է կազմակերպվելու: Մասնակիցները գագաթին կմնան մոտ 2 ժամ, որից հետո նրանց համար Շեյխ Բազըթ և Մարութա լեռան միջև գտնվող հարթավայրում կկազմակերպվի ուրախ ծրագիր: Ծրագրի ավարտից անմիջապես հետո էլ ճաշ կմատուցվի: Փուրշենգ յայլա այցից հետո մասնակիցներն ավտոմեքենաներով կվերադառնան գավառ: Գավառում ու Բաթմանում լեռնագնացության մասին ծանուցող ազդագրեր են կախվելու:

Լեռնագնացությանը մասնակցելու են նաև հայերը

Հուլիսի 30-ին նախատեսվող մագլցմանը մեծ հետաքրքրություն ցուցաբերեցին նաև սասունցի հայերը:

Սպասվում է, որ լեռնագնացությանը կմասնակցեն նաև նախկինում «Ակօս»-ում տպագրված Սասունի մասին իր հոդվածներով հայտնի Բեսսե Քաբաքը, Բիթլիսի, Բաթմանի, Մուշի, Վանի, Ստամբուլի և նահանգների, գավառների ու գյուղերի հայերի և Սասունի հայերի սոցիալական փոխօգնության, համերաշխության և մշակույթի միության նախագահ Ազիզ Դաղջըն, «Ակօս»-ի մի խումբ լրագրողներ, ինչպես նաև` նախկինում Սասունից եվրոպական երկրներ գաղթած հայեր:

Ջիհան լրատվական գործակալություն

10.07.2011