Վանի եկեղեցին պաշտոնապես բացվել է

Վանում ապրող քրիստոնյաները շահել են այն պայքարը, որը 4 տարի շարունակ մղել են` 7 տարի կրոնական արարողությունները կազմակերպված տունը պաշտոնապես որպես եկեղեցի բացելու համար: Վանի քաղաքապետարանի տված թույլտվությամբ Վանում բնակվող 80-90-ի չափ քրիստոնյաներն այդ նպատակով գործածված տունը բացել են որպես եկեղեցի:

Միջինարևելյան երկրներից եկած և Եվրոպա մեկնելու մտադրություն ունեցող այդ քրիստոնյաները, ովքեր փաստաթղթային ձևակերպումների պատճառով հարկադրված են եղել մնալ Վանում, գրեթե 7 տարի կրոնական արարողությունները կազմակերպում էին Ջումհուրիյեթ թաղամասում գտնվող մի երկհարկանի տանը: Քրիստոնյաները պատարագների համար իրենց օգտագործած տնից պաշտոնապես օգտվելու նպատակով «կրոնական արտոնագրի հատկացման» համար 2007 թ. դիմել էին Վանի քաղաքապետարանին: Սակայն այդ դիմումը մինչ օրս չէր ընդունվել` որոշ պատրվակների պատճառով: Այն ժամանակաշրջանում եկեղեցու համայնքի իրավունքները պաշտպանող Բեքիր Քայայի` քաղաքապետ դառնալուց հետո` անցյալ տարվա նոյեմբեր ամսին, վերջինս ընդունել է համայնքի պահանջը և շնորհել կրոնական արտոնագրի հատկացում: Ջումհուրիյեթ թաղամասում գտնվող երկհարկանի տան վրա կախվել է «Վանի եկեղեցի» ցուցանակը:

Համայնքի պատասխանատուներից իրանցի Ֆերհաթ Սոհեին հայտնելով, որ իրենք կրոնական արարողությունները կազմակերպում են թաղամասում գտնվող Վանի եկեղեցում, ասաց. «Շրջապատում մեզ անհանգստացնող որևէ դեպք մինչ օրս չի պատահել: Մեզ շատ լավ են դիմավորել: Նույնիսկ բացման արարողության ժամանակ մեզ շնորհավորողներ եղան»: Եկեղեցում շաբաթական երեք օր կազմակերպվող աղոթքները կատարվում են թուրքերեն, քրդերեն, պարսկերեն և անգլերեն լեզուներով, և եկեղեցում բազմաթիվ լեզուներով տպագրված Ավետարաններ և աղոթերգեր կան: Ինչ վերաբերում է եկեղեցու եկամուտներին, ապա նրա ծախսերը հոգում են արտասահմանաբնակ քրիստոնյաները:

Շատ ուրախ ենք

Ֆերհաթ Սոհեին նշեց, թե իրենց շատ է ուրախացրել այն, որ այդ թույլտվությունը տրվել է մի օտար երկրում: Սոհեին նաև հայտնեց. «Այն օրը, երբ այս վայրը բացվեց որպես եկեղեցի, կոչ հղեցի ողջ աշխարհին: Մեզ այս թույլտվությունը շնորհել է այս ազատ պետությունը: Ես շատ շնորհակալություն եմ հայտնում Վանի քաղաքապետարանին, Վանի անվտանգության տեսչությանը, իմ հարևաններին և բոլոր-բոլորին: Մենք շատ ուրախ ենք: Իրանում բազմաթիվ ճնշումներ կան, և այստեղ շատ են փախստականներ գալիս»:

02.07.2011

Դողան լրատվական գործակալություն

http://www.sondakika.com/haber-van-kilisesi-resmen-acildi-2837830/