Հայերին, քրդերին և մտավորականներին ուղղված սպառնալիք` Թուրքական վրեժխնդրության բրիգադից

Թուրքական վրեժխնդրության բրիգադ կազմակերպությունը (Türk İntikam Tugayı /TİT/) սպառնալիքներ պարունակող մի նամակ է ուղարկել «Էվրենսել» թերթին: «Բաց նամակ» վերնագրի տակ հղված նամակում պահանջվում է, որ հայերը, քրդերը, «Ակօս» և «Էվրենսել» թերթերի աշխակիցները, ինչպես նաև` Սեբահաթ Թունջելն ու Բասքըն Օրանը մինչև օգոստոսի 15-ը լքեն երկիրը:

Եթե նշյալ կազմակերպության` 6 հոդվածից բաղկացած պահանջներն ի կատար ածվեն, ապա միլիոնավոր մարդիկ կլքեն Թուրքիան, և հարյուրավորներն էլ կդառնան արյունահեղությունների թիրախ: Սպառնալիքներ պարունակող նամակում հաճախ օգտագործվող «Լքելու են Թուրքիայի տարածքները» արտահայտությունը ցույց է տալիս, որ նամակագիրների փափագը, այսպես կոչված, «տեղահանությունն» է: Սակայն այս անգամ տեղահանությունն ուղղված է ոչ թե էթնիկական կամ կրոնական խմբերի, այլ` բոլոր նրանց, ովքեր խոսում են հավասարության և ազատության մասին:

Թուրքական վրեժխնդրության բրիգադը գրում է. «Դուք, որպես «Էվրենսել» թերթի աշխատակիցներ, ձեր տպագրած հրապարակումներում թուրքերին և մեծ թուրքական պետությանը վիրավորական գրություններ հրապարակելով` ավելացնում եք սխալները: Այդ պատճառով էլ գործողություններ ձեռնարկելու մեր իրավունքը գաղտնի ենք պահում»: Կազմակերպության պահանջները հետևյալն են.

1. «Մինչև օգոստոսի 15-ը դուք և ձեզ հետ համագործակցողները լքելու են թուրքական հողը և այդ մասին ծանուցելու մամուլում:
2. ՊԿԿ-ի պատգամավոր եղող կամ էլ չեղող համակիրներն ու մարտիկները ևս մինչև նշված ամսաթիվը լքելու են թուրքական տարածքները:
3. Հայկական սփյուռքը որևէ պահանջով հանդես չի գալու, իսկ վերջինիս կողմնակիցներն էլ անվերադարձ լքելու են թուրքական հողերը:
4. «Ակօս» շաբաթաթերթը և իրեն համախոհ մամլո օրգանները փակվելու են, և թերթերի խմբագրությունները` աշխատակիցների հետ մեկտեղ, հեռանալու են թուրքական տարածքներից:
5. Փակվելու են Խաղաղություն և ժողովրդավարություն կուսակցության շենքերը, և այս կուսակցության կողմնակիցները լքելու են թուրքական հողը:
6. Մինչև նշված ամսաթիվը թուրքական տարածքից անվերադարձ հեռանալու են նաև Բասքըն Օրանը, Սեբահաթ Թունջելը, Օսման Բայդեմիրը, Ահմեդ Թյուրքը, Էթյեն Մահչուփյանը և մյուսները»:

Նամակը շարունակվում է հետևյալ արտահայտություններով. «Հաղորդում ենք, որ մինչև 2011 թ. օգոստոսի 15-ը վերոնշյալ պահանջների չիրագործվելու դեպքում ՊԿԿ-ի առաջին գործողության տարելիցին գործողություններ ենք իրականացնելու Դիարբեքիրի այն վայրում, որտեղ քրդական հոծ բնակչություն կա, և որ ծանր կորուստներ ենք պատճառելու թշնամի տարրերին, դարձյալ նույն օրը` օգոստոսի 15-ին, գործողություններ ենք ձեռնարկելու Ստամբուլում հայկական տարրի դեմ և թշնամի հպատակներին զրկելու ազդեցությունից… Որպես Թուրքական վրեժխնդրության բրիգադ, մեր ակտիվ գործողությունները շարունակելով հանդերձ, նախազգուշացնում ենք վերջին անգամ: Մեր պայքարը շարունակվելու է այնքան, քանի դեռ մտավորականի ինքնության տակ թաքնված հայրենիքի դավաճանները և թուրքի թշնամիները չեն վերացել մեջտեղից»:

Թուրքիայի լրագրողների արհմիություն. «Պետք է գործի անցնել»

Թուրքիայի լրագրողների արհմիությունը (Türkiye Gazeteciler Sendikası /TGS/) դատապարտել է «Ակօս»-ին և «Էվրենսել»-ին, ինչպես նաև` նշյալ թերթերի սյունակագիրներին ու մտավորականներին ուղղված սպառնալիքները և դատախազներին գործի անցնելու կոչ արել: Թուրքիայի լրագրողների արհմիության ղեկավար խորհրդից ստացված հայտարարության մեջ ասվում է. «Ուղղված այդ սպառնալիքներին ընդդեմ` մեր համերաշխությունն ենք հայտնում «Էվրենսել» ու «Ակօս» պարբերականներին, մյուս թերթերին, լրագրողներին և մտավորականներին: Բռնություն և ատելություն բովանդակող այդ նամակում արտահայտված սպառնալիքի դեմ դատախազներին ու անվտանգության պաշտոնյաներին կոչ ենք անում գործի անցնել և անհրաժեշտ միջոցներ ձեռնարկել: Հավանական բոլոր հարձակումների և հետևանքների պատասխանատվությունն ընկնելու է այս հարցում իրենց պաշտոնից բխող պարտականություններն անտեսողների վրա»:

Այս կազմակերպության անունը հայտնի դարձավ Աքըն Բիրդալի դեմ մահափորձի ժամանակ

Թուրքական վրեժխնդրության բրիգադ կազմակերպությունը (Türk İntikam Tugayı /TİT/) հայտնի դարձավ 1998 թ. մայիսի 12-ին` Մարդու իրավունքների կազմակերպության նախկին գլխավոր նախագահ Աքըն Բիրդալի դեմ կազմակերպության շենքում կատարված մահափորձի միջոցով: Բիրդալի դեմ ուղղված մահափորձից հետո մարդասպան Սեմիհ Թուֆան Գյունալթայը ձերբակալվել է` Թուրքական վրեժխնդրության բրիգադի անդամ լինելու հիմքով: Գյունալթայը ներկայում դատվում է «Էրգենեքոնի» գործով:

Սույն կազմակերպությունը 2006 թ. սպառնալիքներ պարունակող նամակներ է ուղարկել Մարդու իրավունքների կազմակերպության ստամբուլյան մասնաճյուղի նախկին նախագահ, մարդու իրավունքների պաշտպան Էրեն Քեսքինին և կազմակերպության ղեկավարներին: Բացի այդ` նույն կազմակերպության կողմից սպառնալիքներ են ստացել նաև արվեստի գործիչ Ֆերհաթ Թունչը, Դիարբեքիրի քաղաքապետ Օսման Բայդեմիրը, պատգամավորներ Ահմեդ Թյուրքը, Սեբահաթ Թունջելը և «Ազադիյա վելաթ» պարբերականը:

2006 թ. սեպտեմբերի 12-ին Դիարբեքիրի Քոշույոլու այգում տեղի ունեցած պայթյունից հետո, որին զոհ էին գնացել 10 մարդ, որոնցից 7-ը երեխա, ինչպես նաև` վիրավորվել 16 հոգի, Թուրքական վրեժխնդրության բրիգադն իր վրա էր վերցրել այդ գործողության պատասխանատվությունը: Թուրքական վրեժխնդրության բրիգադ կազմակերպությունը (Türk İntikam Tugayı /TİT/) բազմիցս է սպառնալիքներով նամակներ հղել Բասքըն Օրանին, Էթյեն Մահչուփյանին և «Ակօս»-ին:

Էրգենեքոնի մարդասպան կազմակերպությունը

Թուրքական վրեժխնդրության բրիգադ կազմակերպությունը (Türk İntikam Tugayı /TİT/) «Էրգենեքոն-2» գործի առնչությամբ կազմված մեղադրական եզրակացության մեջ որակվել է որպես Էրգենեքոնի մարդասպան կազմակերպություններից մեկը: Անվտանգության կողմից «Էրգենեքոնի» գործը քննող դատախազների համար պատրաստվել է Թուրքական վրեժխնդրության բրիգադի մասին զեկույց: Իսկ «Էրգենեքոն-3» գործի ամբաստանագրում ուշագրավ է Թուրքական վրեժխնդրության բրիգադի առնչությամբ Հատուկ գործողությունների գրասենյակի նախագահի նախկին պաշտոնակատար Իբրահիմ Շահինի և Ֆաթմա Ջենգիզի միջև կայացած նամակագրությունը: Ֆաթմա Ջենգիզի և Իբրահիմ Շահինի միջև 2008 թ. նոյեմբերի 11-ին կատարված նամակագրության մեջ Ֆաթմա Ջենգիզը նոր հիմնվելիք թիմի համար առաջարկում է Թուրքական վրեժխնդրության բրիգադ կազմակերպության (Türk İntikam Tugayı /TİT/) անվանումը, իսկ Իբրահիմ Շահինը շեշտելով, թե այդ անունն արատավորվել է, ասում է, որ չի ցանկանում այն օգտագործել: Ֆաթմա Ջենգիզն էլ Շահինից պահանջում է այդ կերպ մաքրել Թուրքական վրեժխնդրության բրիգադ կազմակերպության (Türk İntikam Tugayı /TİT/) անունը:

Ակօս, թիվ` 795