«Երգի ճանապարհը սկսել եմ Սրբոց Վարդանանց երգչախմբին անդամակցելով: Այնտեղ հագեցրի հայկական երգերի հանդեպ ունեցած իմ ծարավը: Երգչախումբը մեծ ազդեցություն ունեցավ իմ կյանքում»,-«Էրմենիհաբեր» լրատու կայքին տված հարցազրույցում ասել է թրքահայ երգչուհի Սիբիլ Պեքթորոսօղլուն, որի «Նամակ» երգը` անցյալ տարվա վերջերին թողարկված իր նոր ալբոմից, վերջերս «հիթ» է դարձել Թուրքիայում, եւ դրա տեսահոլովակը հաճախակի ցուցադրվում է պետական հեռուստատեսությամբ: «Հյուրիեթի» փոխանցմամբ` դա առաջին հայկական երգն է, որ հեռարձակվում է Թուրքիայի գլխավոր հեռուստակայանով:
Հովհաննես Շիրազի բառերի հիման վրա գրված «Նամակ» երգը երգչուհու «Սիբիլ» ալբոմից է, որտեղ տեղ են գտել նաեւ «Կիլիկիա» եւ «Տէ’ր, ողորմեայ» հայերեն երգերը:
«Ալբոմը, որը ես թողարկեցի ազգականների օժանդակությամբ, իմ կյանքի երազանքն էր: Այն շատ լավ ընդունվեց ժողովրդի կողմից: Դրական արձագանքներ եղան, եւ չնայած հայերեն բառերը չեն հասկանում, մարդիկ հաճախակի ցանկանում են լսել «Նամակը»,-նշել է երգչուհին:
Սիբիլը ծնվել է եւ այժմ էլ ապրում է Ստամբուլում: 2001 թ. այցելել է Հայաստան: Ալբոմի երգերի մշակումը կատարել է փոփ երաժշտության ասպարեզում ավելի քան 40 տարվա փորձառություն ունեցող հայտնի երաժիշտ Չենք Թաշքանը, որի իսկական անունն է Մաժակ Թոսիկյան:
«ԱԶԳ» ՕՐԱԹԵՐԹ #123
06-07-2011
Leave a Reply