Մալաթիացի հայերը շրջել են իրենց պապենական օջախում

Պոլսաբնակ մալաթիացի հայերից բաղկացած խումբը շրջել է Հեքիմհան գավառում:

Ստամբուլում գործող Մալաթիայի բարեգործ հայերի մշակույթի և համերաշխության միության (MalatyaHAY) անդամները շրջագայություն են կազմակերպել դեպի Հեքիմհան:

Ուղևորությունից առաջ Հեքիմհանի գավառապետ (կայմակամ) Նուրեթթին Դայանին այցելած միության անդամները հայտնեցին, որ այս շրջանը հարուստ է պատմական ժառանգությամբ:

Գավառապետ Դայանը, իր գոհունակությունն արտահայտելով նրանց այցի կապակցությամբ, շեշտեց այդ պատմական արժեքների և հուշարձանների լավ պահպանման և զարգացման անհրաժեշտությունն ու նշեց.

«Հիմնականում Ստամբուլում բնակվող մեր համերկրացիների այցը գոհունակության առիթ դարձավ մեզ համար: Անատոլիայի (Արևմտյան Հայաստան-Ակունքի խմբ.) տարածքներում բազմաթիվ կրոններ և ազգեր են եղել: Մենք երջանիկ ենք, որ նման անցյալ ենք ունեցել: Մեր համաքաղաքացիները դեռ գոյություն ունեցող հուշարձաններ ունեն Մալաթիայում և Հեքիմհանում: Մենք այստեղ ունենք եկեղեցիներ, մզկիթներ և բազմաթիվ այլ հուշարձաններ: Քրիստոսից առաջվա ժամանակներից եկող քաղաքակրթությունների հետքեր կան այստեղ: Տարբեր կրոնների և զանազան մշակույթների պահպանումը, դրանց հետքերը մեծ հարստություն են: Մենք այդ հարստության ժառանգորդներն ենք: Պետք է աչքի լույսի պես պահենք, պահպանենք ու զարգացնենք այդ արժեքները, մեր ունեցած հուշարձանները»:

Անադոլու գործակալություն

02.07.2011