ՄԵԾԿԵՐՏ, Մազկերտ, Մալազկերտ, Մենծկերտ. Գավառ (սանջակ) և գավառակ (կազա) Արևմտյան Հայաստանում` Խարբերդի նահանգում, Դերսիմում: 19-րդ դ. սկզբին մտնում էր Դիարբեքիրի նահանգի մեջ և Չարսանջակի չորս գավառակներից մեկն էր: Դիարբեքիրի փաշայության հին գավառներից է: Քյաթիբ Չելեբին հիշատակում է որպես սանջակ (գավ) Մազկերտ, Մալազկերտ անուններով: Համապատասխանում է պատմական Չորրորդ Հայքի Պաղնատուն գավառին:
Լեռնային, ջրառատ շրջան է, մեծ մասը ծածկված անտառներով: 19-րդ դ. երկրորդ կեսից մտնում է Խարբերդի նահանգի Դերսիմի գավառի մեջ և կազմում է Մազկերտի գավառակը, որը թուրքերն անվանում են նաև Կարաչոր (Գարաչոր): Ոմանք սխալմամբ Մեծկերտն անվանում են նաև Մժնկերտ, որը գտնվում է Բասենում:
20-րդ դ. սկզբներին Մեծկերտ գավառակն ուներ 21 բնակավայր, որից 14-ը` հայաբնակ և քրդաբնակ, 7-ը քրդաբնակ, 3149 տուն` 18232 բնակչով:
Leave a Reply