ՄԱՐԴԻՆ

ՄԱՐԴԻՆ, Մարտին, Մերտին. քաղաք Արևմտյան Հայաստանի Դիարբեքիր նահանգում (այժմ` Թուրքիայի Մարդինի նահանգի վարչական կենտրոնը):

Հին բերդաքաղաք է, պահպանվել են բազմաթիվ շենքերի, ամրոցի և պարիսպների ավերակները: Իտալացի ճամապարհորդ Մարկո Պոլոն գրում է, որ Մարդինի շրջակայքում մշակում էին մեծ քանակությամբ բամբակ, որից պատրաստում էին բեհեզ և այլ գործվածքներ:

1914թ. ուներ 2,5 հազար բնակչություն, որոնցից 1500-ը` հայեր, մնացածը` թուրքեր, ասորիներ, քրդեր, արաբներ և այլն:

Հայերն զբաղվել են հիմնականում արհեստներով, առևտրով, ունեին 2 եկեղեցի ու դպրոց:

Բռնությամբ տեղահանվել են 1915թ. Մեծ եղեռնի ժամանակ: Մեծ մասը զոհվել է գաղթի ճանապարհին: Փրկվածները բնակություն են հաստատել տարբեր երկրներում:

Հայկական համառոտ հանրագիտարան, Հատոր 3, Երևան, 1999: