«Նշանյանի տները» նվիրվեցին Նեսին հիմնադրամին

Շիրինջե գյուղում «արգելված գոտում կառուցված լինելու» հիմնավորմամբ քանդելու որոշում կայացված «Նշանյանի տներ» բուտիկ-հյուրանոցի հիմնադիր Սևան Նշանյանը իրեն պատկանող տները նվիրեց Նեսին հիմնադրամին… Նշանյանն ասաց. «Մտածեցի, որ մնայուն լինելու տեսանկյունից Նեսին հիմնադրամն ավելի հարմար է: Ըստ էության` նվիրելու մտադրություն շատ վաղուց ունեի: Վերջին օրերի ցավալի դեպքերն արագացրեցին գործընթացը»:

Իզմիրի Սելջուկ գավառի պատմական Շիրինջե գյուղում գտնվող բուտիկ-հյուրանոց «Նշանյանի տների» հիմնադիր Սևան Նշանյանը Նեսին հիմնադրամի տնօրեն դոկտոր, պորֆեսոր Ալի Նեսինի հետ գնալով Սելջուկի կադաստրի վարչություն, Նեսին հիմնադրամին նվիրեց Շիրիջեի իր ողջ ունեցվածքը, այդ թվում նաև՝ «Նշանյանի տները», որոնց քանդելու որոշումը փետրվարի 17-ին հետաձգվել էր 15 օրով:

Նշանյանը թափուն (անշարժ գույքի վկայագիր) Նեսին հիմնադրամին հանձնելուց հետո կատարած հայտարարության մեջ նշեց, որ այս շինությունները կառուցվել են, որպեսզի մարդկանց հիշեցնեն գեղեցկության և ազատության մասին, երբեք էլ դրանք իր ունեցվածքը չեն եղել:

Ի պատասխան այն հարցին, թե արդյո՞ք նվիրատվության գործում ազեդցություն ունեցել է քանդելը հետաձգելու որոշմը, Նշանյանն ասաց. «Այնպես էլ չեն կարող քանդել, այսպես էլ: Թող քանդեն, այդ փլատակների տակ պետությունն է մնալու: Նրանց համար, ովքեր չեն կարողանում հասկանալ ճշմարտությունը, անտեղյակության խորը քնից արթնացնելու տեսանկյունից միգուցե մեր կատարած քայլը ուսուցողական լինի»:

Իսկ Նեսին հիմնադրամի տնօրեն դոկտոր, պրոֆեսոր Ալի Նեսինը նշելով, որ սա ամենամեծ նվերն է, որ մինչև այսօր ստացել է հիմնադրամը, ասաց. «Մի կողմ թողենք նվերի նյութական կողմը, հոգևորն ավելի մեծ է: Այս նվիրատվությամբ տիրանում ենք բնությանը, շրջակայքին, կարճ ասած` մի արտակարգ գեղեցկության, ես խոնարհվում եմ սրա առաջ: Մենք էլ անելու ենք մեր ձեռքից եկածը, որպեսզի վաստակենք այս նվիրատվության իրավունքը: Մեր հարստությանն ավելացավ հարստություն, գեղեցկությանը` գեղեցկություն: Մենք անելու ենք այն, ինչ մեր ձեռքից գալիս է, որպեսզի Նեսին հիմնադրամում մեծացող երեխաները հասնեն այս գեղեցկության մակարդակին և որպեսզի վաստակեն այս գեղեցկության իրավունքը: Այս նվերը, բոլոր նվերների նման, պարտավորեցնում և պատասխանատու է դարձնում: Այս նվիրատվությունը կատարած իմ մտերիմ ընկերոջը` Սևան Նշանյանին, Թուրքիայի և աշխարհի անունից շնորհակալություն եմ հայտնում»:

Պրոֆեսոր Նեսինը նվիրատվության կապակցությամբ Սևան Նշանյանին նվիրեց «լացող» և «ծիծաղող» դեմքով արձանը, որի հեղինակը ճարտարապետ Թամ Օրալն է:

Նեսինից արձանի վերաբերյալ տեղեկություններ ստանալով` Նշանյանն ասաց. «Այս արձանը երբեք հակառակ ուղղությամբ չի կանգնելու, մշտապես շիտակ է լինելու և չի լացելու»:

Նաև տեղեկացրեցին, որ այս ընթացքում Նշանյանի տներ կոչված բուտիկ-հյուրանոցը շարունակելու է աշխատեցնել Սևան Նշանյանը:

Անցյալ տարի Իզմիրի նահանգային հատուկ վարչության հանձնախումբը «արգելված գոտում կառուցելու» հիմնավորմամբ որոշում էր կայացրել քանդել Շիրինջե գյուղում կառուցված 22 կառույցները` այդ թվում նաև «Նշանյանի տներ» բուտիկ-հյուրանոցը, սակայն փետրվարի 17-ին Մշակույթի և զբոսաշրջության նախարարության գրության համաձայն` քանդելու որոշումը հետաձգվել է:

http://www.ntvmsnbc.com/id/25186096/